Dünyanın supergücü olan ABŞ ilə qarşılıqlı maraqlara və bərabərhüquqlu hörmətə əsaslanan ikitərəfli əlaqələrdə yeni səhifənin açılması həm bölgəmiz, həm də ölkəmiz üçün yeni fürsətlər vəd edir. Qarşıya qoyulan hədəflərə çatmaq, ən əsası, milli maraqlarımızın müdafiəsi siyasəti uğurla həyata keçirilir. Prezident İlham Əliyevin ABŞ Prezidenti Donald Trampın dəvəti ilə avqustun 8-də Vaşinqtona səfəri iki ölkə arasında münasibətlərin inkişafında yeni səhifənin açılmasına imkan yaratdı. Bakı ilə qarşılıqlı əməkdaşlıqla bağlı imzalanan razılaşmalar, gələcək effektli münasibətlər sisteminin formalaşdırılması üçün intensiv müzakirələr, 907-ci düzəlişin ləğvi Ağ Evin Cənubi Qafqazda Azərbaycanın lider mövqeyini qəbul etdiyini göstərir. Vaşinqtonda imzalanan sənədlərin gələcəyinə skeptik yanaşanların olmasına baxmayaraq, son günlərdə yaşanan proseslər bunun əksini isbatlayır. İlham Əliyevə xüsusi hörmətin bariz nümunəsi Öncə ondan başlayaq ki, Prezident İlham Əliyevin Vaşinqton səfəri ilə bağlı Nazirlər Kabinetinin ardından Milli Məclisdə də xüsusi dinləmələr keçirilib. Deputatlar dövlət başçısının apardığı uğurlu və uzaqgörən siyasət nəticəsində iki ölkə arasında münasibətlərin indiki qədər yüksək səviyyədə olmadığı qənaətini ortaya qoyublar. Qeyd olunub ki, bu razılaşmalar, eyni zamanda, Azərbaycanın ABŞ ilə əlaqələrinin keyfiyyətcə yeni mərhələyə yüksəlməsidir və ölkəmizin beynəlxalq iqtisadi inteqrasiyasının daha da genişlənməsinə töhfəsini verəcək. Deputatların sözlərinə görə, Ağ Evdə uzun illər Azərbaycana qarşı ədalətsiz sanksiya kimi istifadə olunan Azadlığa Dəstək Aktı na 907-ci düzəlişin tətbiqinin dayandırılması isə ikitərəfli münasibətlərdə yeni və olduqca parlaq bir səhifənin açılmasının simvolu oldu. Onlar ABŞ Prezidenti Donald Trampın bu qərarı məhz Prezident İlham Əliyevin iştirakı ilə imzalamasını dövlətimizin başçısına və Azərbaycana göstərilən xüsusi hörmətin bariz nümunəsi kimi qiymətləndiriblər. İntensiv dialoqun şahidi oluruq Son günlərdə iki ölkə arasında rəsmi səviyyədə də intensiv dialoqun şahidi oluruq. Sentyabrın 8-də ABŞ-nin Orta Dəhliz üzrə Sertifikatlaşdırılmış Ticarət Missiyasının nümayəndələri Azərbaycana səfər edib. Aparılan müzakirələrdə Vaşinqton razılaşmalarının regional sülh və tərəqqiyə töhfəsi qeyd edilməklə yanaşı, Azərbaycan-ABŞ əlaqələri üçün böyük perspektivlər açdığı vurğulanıb. Bu xüsusda ölkənin qərb bölgələri ilə Azərbaycanın Naxçıvan Muxtar Respublikası arasında maneəsiz gediş-gəlişi təmin edəcək layihənin əhəmiyyəti diqqətə çatdırılıb. ABŞ şirkətləri Zəngəzur dəhlizi ilə bağlı layihələrdə iştirak etmək, tenderlərdə öz təkliflərini vermək imkanını məmnuniyyətlə qarşılayacaqlar , - deyə ABŞ İnkişaf Maliyyələşdirmə Korporasiyasının (DFC) icraçı direktoru Kennet Angell ölkəsinin Cənubi Qafqazda prioritetini bir daha ortaya qoyub. ABŞ Dövlət Departamentinin Avropa və Avrasiya məsələləri üzrə Bürosunun baş rəsmisi Brendan Hanrahanın səfərində isə başlıca diqqət məhz Azərbaycan-ABŞ ikitərəfli münasibətlərinin inkişafına yönəlib. Xarici işlər naziri Ceyhun Bayramov, İqtisadiyyat naziri Mikayıl Cabbarovla keçirilən görüşlər zamanı Azərbaycan-ABŞ münasibətləri, Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında Anlaşma Memorandumundan irəli gələn məsələlər, Azərbaycan-Ermənistan normallaşma prosesi, habelə qarşılıqlı maraq doğuran regional və beynəlxalq təhlükəsizlik məsələləri müzakirə olunub. 907-ci düzəlişin ləğvinin vacibliyi Maraqlı cəhət budur ki, dövlətlərarası münasibətlərin gələcəyinə fokuslanan məlum səfərlər biristiqamətli deyil. ABŞ nümayəndələrinin Bakı səfəri ilə yanaşı, Azərbaycan nümayəndə heyəti də eyni anda sözügedən istiqamətdə Vaşinqtonda mühüm görüşlər keçirir, danışıqlar aparır. Tramp-Əliyev görüşündə əldə olunan razılaşmaların irəlilədilməsi üçün ABŞ-nin digər institutsional qurumları ilə intensiv dialoq təşkil edilir. Bu məqsədlə ABŞ-yə səfər edən Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev burada ABŞ Konqresinin Nümayəndələr Palatasının (aşağı palata) Xarici Əlaqələr Komitəsinin sədri Brayan Mast və senator Stiv Dayns ilə görüşüb. Görüşlərdə Azərbaycan Prezidenti İlham Əliyev və ABŞ lideri Donald Tramp arasında avqustun 8-də Vaşinqtonda keçirilən sammitin strateji əhəmiyyəti, onun Azərbaycan-ABŞ münasibətləri və regional sülh üçün müsbət nəticələri vurğulanıb. Azərbaycan Prezidentinin köməkçisi 907-ci düzəlişin ləğvinin vacibliyini vurğulayıb. Hikmət Hacıyev Vaşinqtonda ABŞ dövlət katibinin müavini Kristofer Landau ilə görüşüb. Tərəflər Azərbaycan və ABŞ arasında strateji münasibətləri, eləcə də regional məsələləri müzakirə ediblər. Bölgəmiz üçün yeni fürsətlər Göründüyü kimi, Prezident İlham Əliyevin tarixi qələbəmizdən sonra beynəlxalq səviyyədə yürütdüyü real siyasət, milli maraqların müdafiəsinin ön planda tutulması Bakının artan rolunun və nüfuzunun əsasını təşkil edir. Dünyanın super gücü ilə qarşılıqlı maraqlara və bərabərhüquqlu hörmətə əsaslanan ikitərəfli əlaqələrdə yeni səhifənin açılması isə həm bölgəmiz, həm də ölkəmiz üçün yeni fürsətlər vəd edir. Məhz bu əməkdaşlıq sayəsində Cənubi Qafqazda sülh və sabitliyin, iqtisadi inteqrasiyanın, kommunikasiya əlaqələrinin bərpasına mane olmaq istəyən qüvvələrin planları neytrallaşdırılır. Qarşıya qoyulan hədəflərə çatmaq, ən əsası, milli maraqlarımızın müdafiəsi siyasəti uğurla həyata keçirilir. Zəngəzur dəhlizi üçün 145 milyon dollar Yeri gəlmişkən, ABŞ Zəngəzur dəhlizi (Tramp marşrutu) layihəsinin həyata keçirilməsi üçün Ermənistana 145 milyon dollar yardım ayırmaq niyyətindədir. Bunu ABŞ Dövlət Departamentinin Avropa və Avrasiya məsələləri üzrə Bürosunun direktoru Brendan Henrehen İrəvanda Ermənistanın baş nazirinin müavini Mher Qriqoryanla görüşündə deyib. Konqreslə əməkdaşlıq çərçivəsində biz Ermənistana 145 milyon dollar verməyi planlaşdırırıq. Bu, Beynəlxalq Sülh və Rifah naminə Tramp Marşrutu təşəbbüsü və avqustun 8-də əldə olunmuş müvafiq razılaşmalar çərçivəsində maliyyənin ilk tranşıdır , - Henrehen bildirib. ( Kaspi qəzeti)

Ermənistan və Türkiyə Gümrü-Qars dəmir yolu xəttinin bərpası və istismara verilməsi üçün texniki araşdırmalar aparmağı planlaşdırır. Sfera.az xəbər verir ki, bu barədə Ermənistan Xarici İşlər Nazirliyinin xüsusi nümayəndələrin görüşünə dair bəyanatında deyilir. Rubinyan və Sərdar Kılıç, eyni zamanda, ali təhsil müəssisələrinin tələbələri üçün təqaüd imkanları yaratmaq və tarixi Ani körpüsünün birgə bərpası yolu ilə mədəni və akademik sahələrdə əməkdaşlığı gücləndirmək üçün səy göstərməyə razılaşıblar. Xüsusi nümayəndələr, həmçinin 2026-cı ilin yayından etibarən müxtəlif istiqamətlərə uçuşlar həyata keçirən digər maraqlı şirkətlərin cəlb edilməsinə yönəlmiş zəruri işlərin görülməsi barədə razılaşıblar./APA

Hava şəraitinin dəyişməsi insanların psixoloji vəziyyətinə birbaşa təsir göstərir. Temperatur, rütubət, külək və işıqlı günlərin sayı kimi faktorlar əhval-ruhiyyəyə, enerji səviyyəsinə və konsentrasiya qabiliyyətinə təsir edə bilər. Psixoloq Aydan Məmmədova Sfera.az-a bildirib ki, havanın dəyişməsinin insan psixologiyasına bir çox təsiri olur. A.Məmmədova dedi ki, hava şəraitinin dəyişməsi ən çox əhvalın dəyişməsinə səbəb olur ki, bu da insanın bütün fəaliyyətinə, hətta qidalanmasına da təsir göstərir: Buna ümumilikdə mövsümi pozuntu deyilir. Daha çox isə payız və qış fəsillərində rast gəlinir. Çünki bu fəsillərdə günəş işığı azalır. Günəş işığının azalması bəzi insanlarda ruh düşkünlüyünə səbəb olur. Yuxu pozuntusu, insanın daim özünü yorğun hesab etməsi, səhərlər oyanmaqda çətinlik, axşam yatmaqda çətinlik, sosial ortamlardan uzaqlaşma, depressiya kimi hallara rast gəlinir. İştahın pozulması və ya artması hallarına rast gəlinir. Bəzi insanlar daha çox qida istəyərkən, bəziləri isə az qidalanmaq və yaxud da heç qidalanmaq istəmir. Bu daxilən gələn bir şeydir. Həmin insanlar iş həyatında axsamalar yaşaya bilər. Belə insanlar öz fiziki həyatlarını aktiv tutmalıdır. Kiçik yürüşlər belə onların enerjilərinin balansda qalmasına kömək olacaq. Buna görə də qidalanma hökmən rejimə salınmalıdır . Psixoloq hava şəraitinin sosial təcrid hallarına səbəb olduğunu da qeyd etdi: Bunun qarşısını almaq üçün insanlar yaxınları ilə ünsiyyətdə olmalıdır. Həmin insanlar istirahətinə, özünə zaman ayırmalıdır. Bizdən asılı olan məsələlərə reaksiya verməliyik. Əsəbdən stressdən özümüzü qorumağı bacarmalıyıq. Elə insanlar var ki, bu fəsli sevir, elələri də var ki, əksinə əhval-ruhiyyəsi daha da düşə bilər. Əgər belə vəziyyətdə əziyyət çəkirlərsə, mütləq mütəxəssis yardımı lazımdır. Bunun uzun müddət davam etməsi pis sonluqla nəticələnə bilər . Niyaz Hacıyev