Yatmazdan əvvəl bu saatlara diqqət edin
Səhər yorğun oyanır, gecə isə yatağa girdikdən sonra uzun müddət yuxuya gedə bilmirsinizsə yatmazdan əvvəlki vərdişlərinizə diqqət yetirmək faydalı ola bilər. Sosial mediada populyarlaşan “10-3-2-1-0” qaydası daha sağlam yuxu rejimi yaratmağı hədəfləyir.
Sfera.az xəbər verir ki, qaydaya əsasən, yatmazdan 10 saat əvvəl kofein qəbulunu dayandırmaq tövsiyə olunur. Kofeinin təsiri uzun müddət davam edə bildiyindən qəhvə və enerji içkilərini günün daha erkən saatlarında qəbul etmək daha məqsədəuyğundur.
Yatmazdan 3 saat əvvəl ağır yeməklərdən və alkoqoldan uzaq durmaq, 2 saat əvvəl isə işlə bağlı fəaliyyətləri və zehni yorucu tapşırıqları dayandırmaq məsləhət görülür. Bu, orqanizmin yuxuya hazırlaşmasına kömək edə bilər.
Qaydanın “1” mərhələsi yatmazdan 1 saat əvvəl telefon, planşet və kompüter kimi elektron cihazlardan uzaqlaşmağı nəzərdə tutur. Ekran qarşısında uzun müddət qalmaq, xüsusilə də stimullaşdırıcı məzmun izləmək yuxuya getməyi çətinləşdirə bilər.
“0” isə səhər alarm çaldıqda mürgüləmə düyməsinə basmamaq deməkdir. Bununla yanaşı, mütəxəssislər hər gün mümkün qədər eyni saatlarda yatıb-oyanmağın yuxu keyfiyyəti üçün daha vacib olduğunu bildirirlər.
“10-3-2-1-0” qaydasının bütövlükdə yuxusuzluğu müalicə etdiyini göstərən kifayət qədər elmi sübut yoxdur. Lakin kofeinin və ekran istifadəsinin azaldılması, nizamlı yuxu rejiminin yaradılması və yatmazdan əvvəl sakitləşdirici rutin formalaşdırılması sağlam yuxu vərdişləri ilə uyğun gəlir.
Yuxu problemi uzun müddət davam edir gün ərzində güclü yorğunluq yaradır və gündəlik həyata təsir göstərirsə, yalnız bu üsula güvənmək əvəzinə mütəxəssisə müraciət etmək tövsiyə olunur.
Mənsumə
