Bir sıra “Telegram” kanallarının məlumatına görə, Moskvada Azərbaycanla bağlı qeyri-rəsmi nümayəndə heyəti formalaşır. Nümayəndə heyəti bu həftə Bakıya gələ bilər.

Məlumata görə, şəxsən Rusiya Prezidenti Putinin mesajı çatdırılacaq və həbs olunanların mübadiləsi təklifi verilə bilər. Həmçinin, nümayəndə heyətinə Putinin keçmiş şəxsi adyutantı, hazırkı fövqəladə hallar naziri, Azərbaycan nümayəndələri ilə şəxsi münasibətləri yaxşı olan Aleksandr Kurenkov başçılıq edə bilər.

Bəs nümayəndə heyətinin tərkibində kimlər ola bilər? Həmçinin, Azərbaycan-Rusiya münasibətlərində müsbət tendesiya qeydə alına bilərmi?

Mövzu ilə bağlı Sfera.az-a açıqlama verən Azərbaycan-Rusiya parlamentlərarası əlaqələr üzrə işçi qrupunun üzvü, deputat Ceyhun Məmmədov bildirib ki, proseslərin təhlili baş verən gərginliyin səngimək üzrə olduğunu göstərir.

Onun sözlərinə görə, gərginliyin artması heç bir tərəfin maraqlarına uyğun deyil:

“Son günlər Rusiya rəsmilərinin açıqlamaları da onu göstərir ki, Rusiya tərəfi münasibətlərin daha da mürəkkəbləşməsini istəmir. Bu səbəbdən yanaşmaların dəyişdiyini müşahidə edirik. Nümayəndə heyətlərinin səfərləri həmişə olub. Heyətin tərkibində kimlərin olacağını müəyyənləşdirmək qeyri-mümkündür”.

Millət vəkili qeyd edib ki, münasibətlərin normallaşmağına çalışmalıyıq:

“Bu məsələdə medianın da üzərinə böyük vəzifə düşür. Hər birimiz bütün gücümüzü ortaya qoyaraq gərginliyin azalması üçün addımlar atmalıyıq. Bundan sonra da münasibətlərin qorunması və inkişafına yönəlmiş addımlar atılmalıdır. Digər məsələləri isə zaman göstərəcək”.

Firuzə Əliyeva
Sfera.az

Rusiya nümayəndə heyəti Azərbaycana gəlir - Münasibətlər stabilləşəcəkmi?