"WhatsApp" dəstəyi kəsir: Hansı "iPhone" modellərində tətbiq bloklanacaq? - SİYAHI
"WhatsApp" köhnə "iPhone" modelləri ilə bağlı qəti qərarını açıqlayıb.
Sfera.az xəbər verir ki, Dünyanın ən populyar mesajlaşma platforması olan "WhatsApp", təhlükəsizlik protokollarının yenilənməsi və yeni şifrələmə sistemlərinə keçidlə əlaqədar olaraq köhnə model "Apple" cihazlarına dəstəyi kəsir. Şirkətin rəsmi bəyanatına əsasən, 30 noyabr 2026-cı il tarixindən etibarən iOS 15.5 əməliyyat sistemindən aşağı proqram təminatı ilə işləyən bütün "iPhone" smartfonlarında "WhatsApp"ın fəaliyyəti tamamilə dayandırılacaq. Bu qərar həm fərdi "WhatsApp Messenger", həm də kommersiya məqsədli "WhatsApp Business" tətbiqlərinə şamil olunur.
Dəstəyi tamamilə kəsilən və yenilənmə tələb edən modellərin siyahısı
Yeni qaydalara əsasən, bəzi köhnə "iPhone" modellərində tətbiqə giriş tamamilə bloklanacaq, bəzi nisbətən yeni modellərdə isə mütləq proqram təminatının yenilənməsi tələb olunacaq:
·Tətbiqin tamamilə bağlanacağı modellər: "iPhone 5s", "iPhone 6" və "iPhone 6 Plus" modelləri texniki göstəricilərinə görə "iOS 15" sistemini ümumiyyətlə dəstəkləmədiyi üçün bu cihazlarda "WhatsApp" xidmətindən istifadə etmək artıq imkansız olacaq.
·Yenilənmə tələb edən riskli modellər: "iPhone 6s", "iPhone 6s Plus", "iPhone SE" (1-ci nəsil), "iPhone 7" və "iPhone 7 Plus" istifadəçiləri üçün hələ də şans mövcuddur. Bu cihazların sahibləri dərhal telefonun sazlamalar bölməsinə daxil olaraq proqram təminatını mövcud olan son versiyaya (məsələn, iOS 15.8.8) yüksəltməlidirlər. Əgər bu cihazlarda sistem versiyası "iOS 15.4" və ya daha aşağıda qalarsa, noyabrın 30-dan sonra tətbiq fəaliyyətini dayandıracaq.
"WhatsApp" mütəxəssisləri bildirir ki, yeni funksiyaların və xüsusilə məxfilik qorumalarının köhnə sistemlərdə stabil işləməməsi bu addımı məcburi edir. İstifadəçilərə məlumat itkisinin qarşısını almaq üçün qeyd olunan tarixə qədər söhbətlərin ehtiyat nüsxəsini (backup) çıxarmaq tövsiyə olunur.
Altay