Səmra Hüseynovadan 1000 manatlıq borca ETİRAZ

Model Səmra Hüseynova “TikTok” fəaliyyətinə görə ona 1000 manat gəlir vergisi borcu hesablanmasına etiraz edib.

Sfera.az xəbər verir ki, model sosial şəbəkədə paylaşım edərək Vergi Xidmətindən məsələ ilə bağlı açıqlama istəyib.

O bildirib ki, son bir il altı ay ərzində Sumqayıtda sadələşdirilmiş vergi ödəyicisi kimi hesabat təqdim edib. Buna baxmayaraq, ona gəlir vergisi üzrə borc hesablanıb.

Səmra Hüseynova qeyd edib ki, üç il əvvəl də oxşar vəziyyətlə üzləşib və həmin vaxt borc silinib. Model vergi növünün yenidən dəyişdirilməsinin səbəbini anlamadığını vurğulayıb.
O, “TikTok”dan əldə etdiyi gəlirlərin xarici gəlir kimi qiymətləndirilməsinə də etiraz edib. Bildirib ki, platformada qazanc hər ay eyni olmur, bəzən gəlir əldə etsə də, bəzi aylarda qazancı olmur. Model, həmçinin izləyicilərinin azərbaycanlı olduğunu və yayımlarını Azərbaycan dilində apardığını diqqətə çatdırıb.

Səmra Hüseynova vergi orqanlarından ona hesablanmış borcun səbəbi ilə bağlı aydınlıq gətirilməsini istəyib.

Bəsti Rəfizadə
Sfera.az