Avropa qaz anbarları boşalır
Avropa İttifaqının (Aİ) qaz anbarlarında ehtiyatlar 2026/2027-ci illərin istilik mövsümünə 2013-cü ildən bəri ən aşağı səviyyəyə düşüb. Bu, regionun qaz təchizatında fasilələrə qarşı dayanıqlıq imkanlarını məhdudlaşdırır və qış aylarında qiymət dəyişkənliyini artıra bilər.
Sfera.az xəbər verir ki, bu barədə Beynəlxalq Enerji Agentliyinin (BEA) “Global Gas Security Review 2026” hesabatında bildirilib.
Agentliyin qiymətləndirməsinə görə, Avropanın qaz anbarlarında ehtiyatların aşağı səviyyədə olması regionun qış tələbatını ödəmək üçün qlobal mayeləşdirilmiş təbii qaz (LNG) tədarükündən asılılığını artıra bilər.
“Bu vəziyyət Asiya və Cənubi Amerikanın bir sıra ölkələrində qaz saxlama imkanlarının məhdud olması ilə birlikdə qarşıdakı aylarda məhdud sayda çevik LNG tədarükü partiyaları uğrunda rəqabəti gücləndirə və xüsusilə tələbatın yüksək olduğu dövrlərdə spot qiymətlərə artırıcı təzyiq göstərə bilər.
BEA-nın modelləşdirməsinin nəticələrinə görə, havanın normadan daha soyuq keçməsi və Hörmüz boğazı vasitəsilə LNG tədarükündə fasilələrin davam etməsi şərti ilə 2027-ci ilin mart ayının sonuna Aİ-nin qaz anbarlarının doluluq səviyyəsi onların aktiv tutumunun 10 faizindən aşağı düşə bilər.
Bu isə Avropa bazarını əlavə soyuq hava dalğalarına, texniki nasazlıqlara və digər təchizat fasilələrinə qarşı xüsusilə həssas vəziyyətə gətirəcək”, - hesabatda qeyd olunub.
BEA bildirir ki, qaz anbarlarının doluluq səviyyəsi aktiv tutumun 30 faizindən aşağı düşdükdən sonra adətən onlardan qazın çıxarılma sürəti azalır.
Bundan əlavə, istilik mövsümünün sonunda qaz ehtiyatlarının aşağı səviyyədə olması 2027-ci ilin yayında anbarlara yenidən qaz vurulması tələbatını əhəmiyyətli dərəcədə artıracaq. Bu isə qaz bazarındakı gərginliyin gələn il də davam etməsinə səbəb ola bilər./Trend
