BBC işçilərini ixtisar edir: 2000 nəfər işsiz qalacaq
Böyük Britaniyanın ictimai kanalı olan BBC ildə 500 milyon funt sterlinqə (1,13 milyard manat) qənaət etmək üçün işçilərinin sayını azaldacaq.
Sfera.az xəbər verir ki, birinci mərhələdə BBC 550 nəfəri işdən çıxaracaq.
Daha sonra 1250-1450 nəfər işdən azad olunacaq. BBC ümumilikdə 1800 ilə 2000 arasında iş yerinin ixtisarını nəzərdə tutub.
"BBC News"un müvəqqəti baş icraçı direktoru Conatan Munro işçilərinə göndərdiyi elektron poçtda bildirib ki, ixtisarlar xəbər bölməsinə, Şotlandiya, Uels və Şimali İrlandiya yayımlarına və televiziya və radio məzmun qruplarına təsir edəcək.
Munro, "Radio 4"də yayımlanan "The World Tonight" verilişinin dayandırılacağını açıqlayıb. O, həmçinin "Today" verilişində daimi aparıcıların sayının sentyabr ayından etibarən beşdən dördə endiriləcəyini, şənbə günləri yayımlarında tək aparıcının iştirak edəcəyini bildirib.
Munro həmçinin "BBC One"da yayımlanan "Breakfast" verilişinin sentyabr ayından etibarən bazar günləri yayımlanmayacağını və "Sunday with Laura Kuenssberg" və "Newsnight" verilişlərinin istehsal qruplarının birləşdiriləcəyini açıqlayıb.
Təxminən 21 500 tam ştatlı işçisi olan BBC gəlirlərinin böyük bir hissəsini televiziya lisenziyası haqlarından əldə edir. Lakin son illərdə lisenziya alanların sayının azalması qurumun gəlirlərini azaldıb.
Vasif