Beynin qocalmasını ləngidən sadə üsul – Həkimdən TÖVSİYƏ

Beynin qocalması müəyyən yaşdan sonra qəfil başlamır və bu proses böyük ölçüdə insanın həyat tərzindən asılıdır.

Sfera.az bildirir ki, bu barədə “Medicina” klinikasının terapevti və peşə xəstəlikləri üzrə mütəxəssisi Svetlana Burnatskaya “Lenta.ru”ya açıqlamasında danışıb.

Həkimin sözlərinə görə, beynin qocalmasını ləngitməyin insanların çoxu tərəfindən lazımi qədər qiymətləndirilməyən üsulu müntəzəm və keyfiyyətli yuxudur.

O bildirib ki, insan yatarkən beyin sadəcə gün ərzində topladığı yorğunluqdan xilas olmur. Yuxu zamanı sinir sisteminin normal fəaliyyətini dəstəkləyən və maddələr mübadiləsi nəticəsində yaranan tullantıların xaric edilməsinə kömək edən proseslər aktivləşir.

Burnatskaya qeyd edib ki, araşdırmalar xroniki yuxusuzluğun yaddaşın zəifləməsi və gələcəkdə koqnitiv pozuntular riskinin artması ilə əlaqəli olduğunu göstərir. Buna görə də yuxunu işə və ya seriallara görə qurban verilə bilən bir lüks kimi qəbul etmək düzgün deyil.

Həkim vurğulayıb ki, keyfiyyətli yuxunun əsas şərtlərindən biri onun müntəzəm olmasıdır. Hər gün fərqli saatlarda yatmaq, iş günlərində cəmi beş saat yatmaq və həftəsonu uzun müddət yatmaqla yuxu çatışmazlığını kompensasiya etməyə çalışmaq düzgün strategiya deyil. Beyin üçün sabit yuxu rejimi daha faydalıdır.

Terapevt beynin qocalmasını ləngitməyə kömək edən elmi cəhətdən əsaslandırılmış digər üsulları da sadalayıb. Bunlara fiziki aktivlik, qan təzyiqinə və digər damar risk faktorlarına nəzarət, balanslı qidalanma, sosial fəallıq və zehni fəaliyyəti davam etdirmək daxildir.

Həkimin fikrincə, beyni cavanlaşdıran tək bir qida məhsulu və ya xüsusi məşq axtarmaqdansa, gündəlik vərdişlərə diqqət yetirmək daha vacibdir.

Fatimə

Sfera.az