Qırmızı, yoxsa ağ soğan daha faydalıdır?
Soğan gündəlik qidalanmada geniş istifadə olunan tərəvəzlərdəndir. Lakin qırmızı və ağ soğanın faydaları arasında müəyyən fərqlər var. Diyetoloqların fikrincə, ağ soğan daha asan həzm olunur, qırmızı soğan isə antioksidantlarla daha zəngindir.
Sfera.az xəbər verir ki, bu barədə "Pharmaceuticals" yazıb.
Qırmızı soğanın üstünlükləri
Diyetoloq Ceymi Baxamın sözlərinə görə, qırmızı soğan xüsusilə antosianlarla zəngindir. Bu maddələr antioksidant xüsusiyyətə malikdir və ürək-damar sağlamlığının qorunmasına kömək edə bilər.
Qırmızı soğanda kversetin də yüksək miqdardadır. Bu birləşmənin iltihabəleyhinə və hüceyrələri zədələnmədən qoruyan xüsusiyyətlərə malik olduğu bildirilir. Bundan əlavə, qırmızı soğan kalium və fosfor mənbəyidir. Kalium ürəyin fəaliyyətində, fosfor isə sümüklərin və dişlərin sağlamlığında mühüm rol oynayır.
Lakin həssas mədə-bağırsaq sistemi olan insanlarda qırmızı soğan narahatlıq yarada bilər. Tərkibindəki fruktanlar bəzi insanlarda qaz və şişkinliyə səbəb ola bilər.
Ağ soğanın faydaları
Ağ soğan C vitamini, fol turşusu və liflə zəngindir. Dietoloqlar onun ürək-damar sistemini dəstəklədiyini və immunitet üçün faydalı ola biləcəyini bildirirlər.
Ağ soğanda da kversetin və digər antioksidantlar var, lakin onların miqdarı qırmızı soğandakı qədər yüksək deyil. Bundan başqa, ağ soğan fosfor və sink mənbəyidir.
Mütəxəssislər ağ soğanın mədə-bağırsaq problemləri yaşayan insanlarda qırmızı soğana nisbətən daha az narahatlıq yaratdığını qeyd edirlər.
Arıqlamaq üçün hansı daha yaxşıdır?
Diyetoloqların fikrincə, hər iki soğan növü arıqlamaq istəyən insanlar üçün uyğun seçimdir. Çiy, turşuya qoyulmuş və ya bişirilmiş soğan yeməklərə əlavə yağ və şəkər gətirmədən onlara daha zəngin dad verir.
Bəs hansı daha faydalıdır?
Diyetoloqların ümumi qənaətinə görə, seçim insanın sağlamlıq vəziyyətindən və qidalanma tərzindən asılıdır. Ağ soğan daha asan həzm oluna bilər, qırmızı soğan isə daha çox antioksidant ehtiva edir.
Bu səbəbdən mütəxəssislər yalnız bir növə üstünlük vermək əvəzinə hər iki soğan növünü qida rasionuna daxil etməyi məsləhət görürlər./demokrat
