Arıqlamaq istəyənlər üçün ən faydalı qida birləşmələri açıqlandı

Arıqlamaq istəyənlərin qidalanmasında məhsulların düzgün seçilməsi ilə yanaşı, onların hansı formada birlikdə qəbul edilməsi də mühüm rol oynayır. Bəzi qida birləşmələri toxluq hissini uzatmağa, iştahanı nəzarətdə saxlamağa və həddindən artıq yeməyin qarşısını almağa kömək edə bilər.

Sfera.az xəbər verir ki, bu barədə “Dzen” platformasının "Healthy" bloqunda məlumat verilib.

Mütəxəssislərin sözlərinə görə, ən universal seçimlərdən biri zülallı qidaların tərəvəzlərlə birlikdə qəbul edilməsidir. Zülal toxluq hissini artırır, tərəvəzlərin tərkibindəki lif isə həzmi dəstəkləyir və həddindən artıq yemək istəyini azalda bilər. Bu birləşmədən həm əsas yeməklərdə, həm də ara öyünlərdə istifadə etmək mümkündür.

Digər faydalı seçim mürəkkəb karbohidratların tərəvəz və göyərti ilə birlikdə qəbul edilməsidir. Tam taxıllı çörək və makaron, qəhvəyi düyü, qarabaşaq və arpa bu qrupa daxildir. Belə qidalanma orqanizmi enerji ilə təmin etməklə yanaşı, rasionun lif baxımından zənginləşməsinə kömək edir.

Səhər yeməyi və ya sağlam desert üçün isə kəsmik, giləmeyvə və darçın birləşməsi tövsiyə olunur. Kəsmikdəki zülal iştahanı azaltmağa, giləmeyvələr vitamin və minerallarla təmin etməyə kömək edir. Darçın isə şirniyyata olan istəyin idarə edilməsində faydalı ola bilər.

Qeyd edək ki, arıqlama prosesində təkcə ayrı-ayrı qida birləşmələri deyil, ümumi qidalanma rejimi, porsiyaların həcmi və fiziki aktivlik də əhəmiyyətlidir.

Mütəxəssislər sağlam çəkiyə nail olmaq üçün balanslı və davamlı qidalanma vərdişlərinin formalaşdırılmasını vacib hesab edirlər.

Fatimə