2027-ci ildə lüks səyahətlər çoxalacaq - ADLAR
2027-ci ildə lüks səyahətə marağın artacağı gözlənilir.
Ekspertlər yüksək gəlirli turistlərin seçimlərində məxfilik, fərdiləşdirilmiş xidmətlər, ailəvi səfərlər və xüsusi tədbirlərin ön plana çıxacağını bildirirlər.
Sfera.az xəbər verir ki, “Virtuoso” şirkətinin 2027-ci il üzrə “Luxe Report” hesabatında 50-dən çox ölkədən 3 100-dən artıq səyahət məsləhətçisinin fikirləri əks olunub. Hesabata görə, sorğuda iştirak edən məsləhətçilərin 59 faizi səyahətlərə xərclərin gələn il orta səviyyədə artacağını, 13 faizi isə ciddi artım olacağını düşünür. Daha 23 faiz isə xərclərin 2026-cı ilin səviyyəsində qalacağını proqnozlaşdırır.
“Virtuoso” hesab edir ki, bu göstəricilər varlı turistlərin sadəcə əvvəlki xərcləmə səviyyəsini qorumaqla kifayətlənmədiyini, daha mənalı təcrübələrə, yüksək keyfiyyətə və xüsusi imkanlara daha çox vəsait ayırdığını göstərir. Avropa lüks turistlərin əsas seçimlərindəndir 2027-ci ildə Avropanın lüks səyahət xəritəsində üstün mövqeyini qoruyacağı gözlənilir. Ən populyar 10 istiqamətin 7-si Avropa ölkələrinin payına düşür.
Yaponiya birinci yerdə qərarlaşıb. İlk beşliyə həmçinin İtaliya, Fransa, Yunanıstan və İspaniya daxildir. Xorvatiya, Cənubi Afrika, Portuqaliya, Böyük Britaniya və ABŞ da lüks turistlərin ən çox seçəcəyi 10 istiqamət arasında yer alıb. Araşdırmaya əsasən, imkanlı turistlərin 2027-ci ildə səyahət etməsinin əsas səbəbləri əlamətdar hadisələri qeyd etmək, yeni məkanlar kəşf etmək və yaxınları ilə vaxt keçirmək olacaq. Çoxnəsilli ailə səyahətləri, yalnız yaxın ailə üzvləri ilə istirahət və ekspedisiya kruizləri də əsas trendlər sırasında göstərilib.
Lüks səyahətdə məxfilik və fərdiləşdirmə önə çıxır “Virtuoso”nun məlumatına görə, “ultralüks səyahətlərə” maraq 47 faiz artıb. Buraya eksklüziv, özəl və yüksək səviyyəli səyahət təcrübələri daxildir. 2027-ci ildə bu kateqoriyada ən populyar istiqamətlərdən biri “all-inclusive” – hər şey daxil istirahət olacaq. Müasir lüks otellər əvvəlki standartlardan fərqlənərək qonaqlara daha fərdi xidmətlər təqdim edir. Özəl villalar, xüsusi menyular və fərdi yanaşma bu seqmentdə əsas üstünlüklərdən sayılır. İkinci əsas trend isə əlamətdar hadisələrlə bağlı səyahətlərdir. Toylar, yubileylər, ailə toplantıları, məzuniyyət mərasimləri və xüsusi ad günləri üçün təşkil olunan səfərlərə tələbat artır.
2027-ci ildə bal ayı üçün ən populyar istiqamətlər arasında Yunanıstan, Bali, Maldiv adaları, İtaliya və Fransız Polineziyası göstərilir.
Varlı turistlər izdihamdan uzaqlaşmaq istəyir
Lüks səyahətdə məxfilik də getdikcə daha böyük əhəmiyyət qazanır. Sosial şəbəkələrin əvvəllər az tanınan məkanları qısa müddətdə turist axınına məruz qoyması yüksək gəlirli turistlərin seçimlərinə də təsir edir. Bu səbəbdən onlar izdihamdan, növbələrdən və turist sıxlığından uzaq, daha sakit və özəl məkanlara üstünlük verirlər. Bundan başqa, fərdiləşdirilmiş təcrübələr də lüks turizmin əsas istiqamətlərindən birinə çevrilir. Turistlər artıq sadəcə bahalı oteldə qalmaq və ya xaricə səyahət etmək istəmirlər. Onlar şəxsi maraqlarına uyğun hazırlanmış xüsusi proqramlara üstünlük verirlər.
Özəl ekskursiyalar, fərdi marşrutlar və xüsusi zövqlərə uyğun təşkil olunan restoran təcrübələri buna nümunədir. Macəra turizmi də zənginlərin diqqətində olacaq 2027-ci ildə yüksək gəlirli turistlərin üstünlük verəcəyi istiqamətlər arasında aktiv və macəra səyahətləri də yer alır. Araşdırmaya görə, macəra turizmi üçün ən populyar beş istiqamət Antarktida, Cənubi Afrika, İslandiya, Kosta-Rika və Keniya olacaq. Beləliklə, 2027-ci ildə lüks turizmdə əsas tendensiya sadəcə bahalı istirahət deyil, daha fərdi, özəl, rahat və unudulmaz təcrübələr əldə etmək olacaq.
Fatimə
