Körpələrə ana südü nə qədər verilməlidir?
Ana südündən və ya süni qidadan bərk qidalara keçid körpələrin bağırsaq mikrobiomunda dəyişikliklərə səbəb olur. Yeni araşdırmaya görə, ana südü ilə qidalanmanın müddəti bu prosesdə mühüm rol oynaya bilər.
Sfera.az xəbər verir ki, “Scientific Reports” jurnalında dərc olunan araşdırmada İrlandiyada 125 ana-körpə cütlüyü üzərində aparılan müşahidələrin nəticələri təhlil edilib. Körpələr bərk qidalara keçməzdən əvvəl və sonra ümumilikdə 250 nümunə araşdırılıb.
Nəticələr göstərib ki, bərk qidaların verilməsinə başlanıldıqda bağırsaqdakı bakteriyaların fəaliyyəti dəyişir. Süd şəkərlərinin parçalanması ilə bağlı proseslər azalır, mürəkkəb karbohidratların parçalanması isə artır. Bu dəyişikliklər bəzi körpələrdə 4 aylıq yaşdan etibarən müşahidə olunub.
Araşdırmanın diqqətçəkən nəticələrindən biri ana südü ilə qidalanmanın müddəti ilə bağlıdır. Alimlər müəyyən ediblər ki, ana südü ilə qidalanmanın daha uzun davam etməsi bağırsaq mikrobiomundakı bakteriyaların müxtəlifliyi ilə əlaqəlidir. Bərk qidaya hansı yaşda başlanması isə bu göstərici ilə əhəmiyyətli əlaqə göstərməyib.
Süni qida ilə qidalanan körpələrdə bərk qidalara keçiddən sonra bağırsaq mikrobiomunda daha çox dəyişiklik qeydə alınıb. Araşdırmada əlavə qidaların verilməsindən sonra B1, B7 və B9 vitaminlərinin istehsalı ilə bağlı proseslərin artdığı, K2 və B6 vitaminləri ilə əlaqəli bəzi proseslərin isə azaldığı müəyyən edilib.
Ümumdünya Səhiyyə Təşkilatı körpələrin həyatının ilk 6 ayında yalnız ana südü ilə qidalanmasını, daha sonra isə ana südünü davam etdirməklə yanaşı, əlavə qidaların verilməsini tövsiyə edir.
Tədqiqatçılar vurğulayırlar ki, araşdırma hər hansı qidalanma formasının digərindən daha sağlam olduğunu sübut etmir. Tədqiqat yalnız qidalanma ilə bağırsaq mikrobiomundakı dəyişikliklər arasındakı əlaqəni göstərir.
Alimlərin fikrincə, erkən yaşlarda qidalanmanın bağırsaq mikrobiomuna təsirini daha yaxşı anlamaq gələcəkdə körpələrin qidalanması ilə bağlı tövsiyələrin hazırlanmasına kömək edə bilər.
Firuz
