Divarları yalamaq və su dəydirmək qadağandır
Su ilə təmasda olduqda əriyən duzdan tikilən bu qeyri-adi otel dünyanın ən quraq bölgələrindən birində yerləşir. Oteldə qonaqlara divarları və duzdan hazırlanan əşyaları yalamaq qəti şəkildə qadağan edilib. Yağışlı mövsümdən sonra isə otelin bəzi hissələri yenidən bərpa olunur.
Sfera.az xəbər verir ki, əsrlərdir qidaların dadlandırılması və qorunması üçün istifadə edilən duz tikinti materialı kimi isə riskli hesab olunur. Nəmi özünə çəkməsi və su ilə təmasda əriməsi səbəbindən duzun tikililərə zərər verə biləcəyi düşünülür.
Lakin Boliviyanın dünyanın ən quraq bölgələrindən biri olan ərazisində bu qayda tamamilə fərqli şəkildə tətbiq edilib.
1 milyondan çox duz bloku istifadə olunub
Dünyanın ən böyük duz düzənliyi olan Salar de Uyuni ərazisində yerləşən Palacio de Sal oteli tamamilə bölgədən çıxarılan duzdan inşa edilib.
Otelin yalnız divarları deyil, masaları, stulları, döşəmələri və müxtəlif dekorativ elementləri də duzdan hazırlanıb. Tikinti zamanı bir milyondan çox sıxılmış duz blokundan istifadə olunub.
Blokların bir-birinə bərkidilməsi üçün isə duz və sudan hazırlanmış xüsusi məhluldan istifadə edilib.
Otelin ən böyük düşməni sudur
Duzdan tikilmiş oteldə qalmağın özünəməxsus qaydaları var. Qonaqlara divarları və duzdan hazırlanan mebelləri yalamaq qəti şəkildə qadağandır.
Tikilinin qarşılaşdığı ən böyük təhlükə isə yağış və nəmdir. Yağışlı mövsümdən sonra duz bloklarının bir hissəsi əridiyi üçün oteldə mütəmadi olaraq təmir və bərpa işləri aparılır.
Beləliklə, duz blokları ilə yenilənən Palacio de Sal təbiətin şərtlərinə uyğun olaraq daim dəyişən və bərpa olunan dünyanın ən qeyri-adi otellərindən biri kimi diqqətçəkir.
Mənsumə
