Kim Türkiyədə daha çox pul xərcləyir? - Azərbaycanlı, rus və avropalı turistlərin MÜQAYİSƏSİ
2026-cı ilin ilk yarısında Türkiyənin turizm gəlirləri 25,75 milyard dollar təşkil edib. Ölkəyə gələn ziyarətçilərin sayı ötən ilin eyni dövrü ilə müqayisədə 2,7 faiz azalaraq 24,84 milyon nəfər olsa da, turistlərin orta xərcləri artıb.
Sfera.az xəbər verir ki, Türkiyə Statistika Təşkilatının (TÜİK) məlumatına görə, 2026-cı ilin yanvar-iyun aylarında bir turistin Türkiyədə orta xərci 1020 dollar təşkil edib. Bu, təxminən 1734 manat deməkdir. Gecələməyə görə orta xərc isə 108 dollar, yəni təxminən 184 manat olub.
Turizm gəlirlərinin mühüm hissəsi fərdi səfərlərin payına düşüb. 2026-cı ilin ilk rübündə Türkiyənin 9,896 milyard dollarlıq turizm gəlirinin təxminən 1,225 milyard dolları paket turların hesabına formalaşıb. Bu məbləğ təxminən 2,08 milyard manatdır.
Azərbaycanlılar Türkiyədə istirahət üçün nə qədər pul xərcləyir?
Hazırda Bakıdan Antalya istiqamətində 7 gecəlik turpaketlərin qiyməti adambaşına təxminən 1200-2000 manat aralığında dəyişir. Paketlərə əsasən aviabilet, hotel, qidalanma, transfer, baqaj və sığorta daxildir. Daha sərfəli variantlarda 7 gecəlik Antalya istirahətini 1 100-1 400 manat civarında əldə etmək mümkündür. Daha yüksək kateqoriyalı və “Ultra All Inclusive” otellərdə isə qiymət 1 900 manat və daha yuxarı ola bilər.
Yəni 2 nəfərlik ailə üçün 7 gecəlik Antalya tətilinin yalnız turpaket xərci təxminən 2 400-4 000 manat təşkil edə bilər. Əlavə şəxsi xərclər, ekskursiyalar və alış-veriş bu məbləğə daxil deyil.
Rusiyalılar Türkiyədə nə qədər xərcləyir?
Rusiyalı turistlər Türkiyənin əsas turizm bazarlarından biri olaraq qalır. 2026-cı ilin yay mövsümündə Rusiyadan Türkiyəyə, xüsusilə Antalya istiqamətinə 7 gecəlik “all inclusive” tur paketlərinin qiyməti təxminən 75-120 min rubl arasında dəyişir. Bu məbləğ təxminən 1539 2461 manat edir. Qiymətə adətən uçuş, hotel, qidalanma və transfer kimi xidmətlər daxil olur. Lakin qiymət hotelin səviyyəsi, tarix və tur şirkətindən asılı olaraq dəyişir.
Türkiyənin əsas Avropa turizm bazarları sırasında Almaniya və Böyük Britaniya xüsusi yer tutur.
Böyük Britaniyadan Türkiyəyə səfərlərin 2026-cı ilin ilk rübündə artdığı bildirilir.
Ümumilikdə isə Türkiyədə 2026-cı ilin ilk yarısında bir turistin orta hesabla 1020 dollar (1734 manat) xərcləməsi ölkənin turizm sektorunda yüksək gəlirli bazarların əhəmiyyətini göstərir.
Beləliklə, 2026-cı ilin göstəriciləri Türkiyənin turizm bazarında turist sayından daha çox adambaşına xərclərin və turistin ölkədə qalma müddətinin əhəmiyyət qazandığını göstərir.
Qeyd edək ki, Türkiyənin turizm gəlirləri 2026-cı ilin ilk yarısında 25,75 milyard dollar təşkil edib. Ziyarətçilərin sayının azalmasına baxmayaraq, orta xərclərin 2,5 faiz artması turizm gəlirlərinin yüksək səviyyədə qalmasına imkan verib.
Əzizə Zeynal
Sfera.az
