İstilik dalğaları niyə qadınlara daha çox təsir edir?
Son illərdə dünyada müşahidə olunan rekord istilər qadınların sağlamlığı üçün daha ciddi risk yaradır. Araşdırmalar göstərir ki, hormonal dəyişikliklər, bioloji xüsusiyyətlər və sosial amillər səbəbindən qadınlar həddindən artıq istiyə kişilərlə müqayisədə daha həssasdırlar.
Sfera.az xəbər verir ki, Böyük Britaniya Milli Səhiyyə xidmətinin (NHS) qadın sağlamlığı üzrə mütəxəssisi dr. Nighat Arif isti dalğalarını qadınların ürək-damar sistemi üçün “stress testi” adlandırıb. Onun sözlərinə görə, qadın orqanizmi yüksək temperatur şəraitində daha çox yüklənir.
Mütəxəssislər bildirirlər ki, qadınlar kişilərə nisbətən daha az tərləyir və bədən temperaturu daha yüksək həddə çatdıqdan sonra tərləməyə başlayırlar. Bu isə artıq istiliyin orqanizmdən xaric olunmasını çətinləşdirir. Bundan əlavə, bədəndə yağ faizinin daha yüksək olması istiliyin saxlanmasına səbəb olur.
Estrogen və progesteron hormonlarında baş verən dəyişikliklər də istiliyə həssaslığı artırır. Xüsusilə menstruasiya dövrü, perimenopoz, menopoz, hamiləlik və ana südü ilə qidalanma zamanı bədənin temperatur tənzimləmə qabiliyyəti zəifləyir.
Mütəxəssislərin sözlərinə görə, hamilə qadınlar metabolik istiliyin və maye ehtiyacının artması səbəbindən isti havalarda daha böyük risk altındadırlar. Elmi araşdırmalar yüksək temperaturun həm ana, həm də döl üçün mənfi nəticələrə səbəb ola biləcəyini göstərir.
Həkimlər isti havalarda bol maye qəbul etməyi, günün ən isti saatlarında açıq havada ağır fiziki fəaliyyətdən çəkinməyi, sərin mühitdə qalmağı və bədənin verdiyi siqnallara diqqət yetirməyi tövsiyə edirlər. Onların fikrincə, iqlim dəyişikliyi fonunda qadınların sağlamlığını qorumaq üçün daha məqsədyönlü tədbirlərin görülməsi vacibdir.
Mənsumə