Neftin qiyməti 66 dollar olacaq - Yeni proqnoz
ABŞ Enerji İnformasiya Administrasiyasının (EIA) son hesabatına əsasən, "Brent" markalı neftin barel qiyməti bu il üçün 65,97 dollar olaraq proqnozlaşdırılıb. Bu, əvvəlki hesabatla müqayisədə 0,12 dollar artım deməkdir. Qlobal neft tələbinin artımının yavaşlaması və OPEC+ qrupunun hasilat artımı ilə ehtiyatların artması qiymətlərin ucuzlaşmasına gətirib çıxarıb.
Sfera.az xəbər verir ki, ilin ilk beş ayında qlobal neft ehtiyatlarının gündəlik orta hesabla 800 min barel artacağı gözlənilir.
Bu, İƏİT ölkələrində tələbin azalması və OPEC+ ilə qeyri-OPEC+ ölkələrindən təklifin artması ilə əlaqədardır. İlin ikinci yarısında isə ABŞ-da neft hasilatının sabit qalması və qlobal tələbin artması fonunda ehtiyat artımlarının azalması, bazarın tarazlığa doğru meyl etməsi proqnozlaşdırılır.
"West Texas Intermediate" (WTI) markalı neftin barel qiymətinin isə 62,33 dollar olacağı gözlənilir. Gələn il üçün "Brent" markalı neftin qiyməti 59,24 dollar, WTI isə 55,58 dollar səviyyəsində proqnozlaşdırılıb.
Bununla belə, hesabatda qiymət təxminləri ilə bağlı qeyri-müəyyənliklərin davam etdiyi vurğulanır. Kanadada meşə yanğınları, Rusiya-Ukrayna müharibəsi, Liviyada mümkün ixrac fasilələri və OPEC+ hasilat koordinasiyası kimi risklər bazara təsir edə bilər. Bundan əlavə, ABŞ-ın İran, Rusiya və Venesuelaya qarşı ticarət siyasəti və sanksiyaları da neft qiymətlərində dalğalanmalara səbəb ola biləcək amillərdəndir.
Altay
