"Gender bərabərliyinin ən mühüm elementlərindən biri də sahibkarlığın inkişafında qadınların rolu ilə bağlıdır".

Sfera.az xəbər verir ki, bunu Milli Məclisin bu gün keçirilən plenar iclasında deputat Vüqar Bayramov Gender bərabərliyinin təmin edilməsinə nəzarəti həyata keçirən icra hakimiyyəti orqanının 2024-cü ildə fəaliyyəti haqqında məlumatının müzakirəsi zamanı deyib.

Qeyd edib ki, fərdi sahibkarların 77 faizi kişi, 33 faizi isə qadındır. Azərbaycanda hər 5 sahibkardan 1-i qadın olsa da, kiçik sahibkarların 16 %-i, orta sahibkarların isə 8 %-i, qadınlardır. İri sahibkarlar arasında isə qadın yoxdur. Bu baxımdan, orta və iri sahibkarlıq subyektlərində qadınların daha yaxından iştirakının təşviq edilməsi vacibdir.

"Bu fərq əmək haqqı arasındakı fərqdə də özünü göstərir. Belə ki, qadınların orta aylıq əmək haqqısı 791 manat, kişilər 1160 manatdır. Doğrudur, bunun bir sıra obyektiv səbəbləri olsa da bu fərqin minimumlaşdırılması prioritetliyini qoruyub saxlayır. Digər tərəfdən, əməkhaqqı fərqi pensiya məbləğində də özünü göstərir. Bu baxımdan, qadınların pensiya məbləği hesablanan zaman keyfiyyət meyarlarından və eləcə də xüsusi əmsallardan istifadə məqsədəuyğun olardı".

2024-cü ildə qadınlara 18.8 milyon manat güzəştli kreditlər verilməsi və bunun 2023-cü ildəki 16.4 milyon manatdan 2.4 milyon manat çox olması məsələsinə diqqət çəkən V.Bayramov yenə də güzəştli kredit portfelində qadınların payının az olaraq qaldığını bildirib.

"Belə ki, ümumillikdə 2024-cü ildə 248 milyon manat güzəştli kredit verilib. Bu o deməkdir ki, ötən il güzəştli kreditlərin cəmi 7.5 faizi qadın sahibkarlara təqdim olunub. Bu isə qadın sahibkarların güzəştli kreditlərə çıxış imkanlarının artırılmasını daha da aktuallaşdırır".

Nəzərə çatdırıb ki, sənədin tövsiyyələr hissəsində qadın sahibkarların stimullaşdırılması qeyd olunur və bu tamamilə doğru tövsiyyədir. Millət vəkilinin fikrincə, tövsiyyələr hissəsində bunun üçün potensial vasitə və alətlərin qeyd olunması daha məqsədəuyğun olardı.

"Bir müddətdir ki, cəmiyyətdə müzakirə olunan Aliment fondunun yaradılması da təklif olunur. Bununla belə, bu fond yaradılarsa onun maliyyələşmə mənbələri və eləcə də boşanmaların sayına təsirlərinin qiymətləndirilməsi də yaxşı olardı",- deyə Vüqar Bayramov fikrini tamamlayıb.

Firuzə Əliyeva
Sfera.az

"İri sahibkarlar arasında qadın yoxdur" - Vüqar Bayramov