"Mercedes-Benz"in satışları 6% azaldı
“Mercedes-Benz”in qlobal avtomobil və mikroavtobus satışları 2026-cı ilin üçüncü rübündə ötən ilin eyni dövrü ilə müqayisədə 6% azalaraq 491 700 ədəd təşkil edib.
Sfera.az xarici mediaya istinadən xəbər verir ki, şirkətin satış göstəricilərinin zəifləməsində əsas amil Çindəki tələbatın azalması olub. Xəbərin yayılmasından sonra “Mercedes-Benz” səhmləri günorta saatlarında təxminən 4% ucuzlaşıb, daha sonra itkilərin bir hissəsini bərpa edib.
Şirkətin açıqlamasına görə, Çin bazarında satışlar 31% azalaraq ciddi geriləmə nümayiş etdirib. Asiya regionunda isə ümumi satışlar 25% azalaraq 132 300 avtomobilə düşüb. Şirkət zəif nəticələri Çində güclü rəqabət və bazardakı mürəkkəb vəziyyətlə əlaqələndirib.
Çində “Mercedes-Benz”in ən çox satılan modelləri GLC və E-Class olub. Bu iki model ölkədəki “Mercedes-Benz Cars” satışlarının təxminən üçdə ikisini təşkil edib.
Avropada və ABŞ-də satışlar artıb
Çindən kənarda isə şirkətin satışları 2% artıb. Minik avtomobillərinin satışı isə 1% yüksəlib.
Avropada “Mercedes-Benz Cars”ın satışları üçüncü rübdə 5% artaraq 168 700 avtomobilə çatıb. Almaniyada satışlar 13%, Böyük Britaniyada isə 7% yüksəlib. Şimali Amerikada da müsbət dinamika qeydə alınıb. Burada satışlar 4% artaraq 83 200 avtomobil təşkil edib. ABŞ bazarında artım 6% olub.
Elektrikli avtomobillərə tələbat rekord həddə çatıb
Şirkətin diqqət çəkən nəticələrindən biri tam elektrikli avtomobillərin (BEV) satışlarındakı kəskin artım olub.
Üçüncü rübdə “Mercedes-Benz”in elektrikli avtomobil satışları illik müqayisədə 61% artaraq 68 400 ədədə çatıb. Bu göstərici ikinci rüblə müqayisədə də 29% çoxdur. “Mercedes-Benz Cars” tarixində ən yüksək rüblük BEV satışını qeydə alıb. Şirkət xüsusilə elektrikli GLC modelinə olan tələbatın artdığını bildirib. Modelin satışları ikinci rüblə müqayisədə üç dəfədən çox artıb.
Avropada elektrikli avtomobillərin satışları illik ifadədə 78%, əvvəlki rüblə müqayisədə isə 24% yüksəlib.
Şirkətin satış və müştərilərlə iş üzrə idarə heyətinin üzvü Matthias Geisen bildirib ki, yeni elektrikli GLC, CLA, GLB və GLA modelləri Avropada ilin sonuna qədər tam satılıb və sifariş portfeli artıq 2027-ci ilə keçib.
Məlumata görə, Almaniyanın Bremen və Rastatt, eləcə də Macarıstanın Kecskemét şəhərindəki zavodlar artan tələbatı qarşılamaq üçün üç növbəli rejimdə çalışır. Tam elektrikli avtomobillər üçüncü rübdə “Mercedes-Benz”in qlobal minik avtomobili satışlarının 16,8%-ni təşkil edib. Bu, ötən ilin eyni dövrü ilə müqayisədə 7,2 faiz bəndi çoxdur.
İlin ilk 9 ayının nəticələri
2026-cı ilin ilk doqquz ayında “Mercedes-Benz” 1 milyon 244 min 400 minik avtomobili satıb. Bu, ötən ilin eyni dövrü ilə müqayisədə 7% azdır. Eyni zamanda, tam elektrikli avtomobillərin satışı 40% artaraq 165 500 ədədə çatıb.
Beləliklə, şirkətin əsas problemi Çin bazarında satışların kəskin azalması olaraq qalır. Avropa və Şimali Amerikadakı artım, eləcə də elektrikli avtomobillərə artan tələbat bu geriləməni tam kompensasiya edə bilməyib.
Fatimə
Sfera.az
