Maskın arzusu gerçəkləşdi: “Tesla Diner” restoranı Hollivudda açıldı - FOTO
Dünyanın ən zəngin insanı İlon Maskın illərdir planlaşdırdığı “Tesla Diner & Drive-In” restoranı Hollivudda fəaliyyətə başlayıb.
Sfera.az xarici mediaya istinadən xəbər verir ki, restoran Hollivudun mərkəzində, əvvəllər “Shakey’s Pizza” şəbəkəsinə məxsus binada yerləşir.
“Tesla” texnologiyaları ilə təchiz olunan məkan həm də açıq hava kinoteatrı funksiyasını daşıyır. Restoranda “Cybertruck” dizaynlı yemək qabları, eləcə də İlon Maskın təqdim etdiyi “Optimus” adlı robot fəaliyyət göstərir. Robot açılış zamanı damda qonaqlara popkorn paylayaraq ürək formasında əl hərəkətləri ilə diqqət çəkib.
Yeməklərin qiymətləri 4-15 dollar arasında dəyişir.
Ziyarətçiləri retro üslubda, rolikli ofisiantlar qarşılayıb. Sifarişlər tamamilə rəqəmsal kiosklar vasitəsilə qəbul edilib.
Açılışa yalnız Los-Ancelesdən deyil, digər ştatlardan da gələnlər olub. Onlar arasında dörd “Tesla” sahibi olan Hammar ailəsi və “Tesla Owners Silicon Valley” “X” hesabının qurucusu da yer alıb.
İlon Mask isə açılış günü “X” hesabında paylaşdığı məlumatda bildirib ki, əgər “Tesla Diner” layihəsi uğurlu olarsa, dünyanın müxtəlif şəhərlərində və “Supercharger” stansiyalarında yeni restoranların açılması planlaşdırılır.
Bəsti Rəfizadə
Sfera.az
