ABŞ və Türkiyənin vasitəçilik cəhdlərinə baxmayaraq Suriyanın cənub regionunda atəşkəsi təmin etmək mümkün olmur. Silahlı qruplar arasında toqquşma davam edir, hökumət qüvvələri isə hərbi müdaxilələlərlə vəziyyəti normallaşdırmağa çalışır.

Yaranmış vəziyyətdə İsrail də öz maraqlarına uyğun olaraq Suriyaya hücumlarını davam etdirir. Duruzları müdafiə edən İsrail Suriyanın hazırkı prezidentinin legitimliyini qəbul etmir, onun hakimiyyətdən getməsini istəyir. Bəzi iddialara görə hətta İsrail sui-qəsd cəhdi ilə Suriyanın müvəqqəti rəhbərini öldürməyə çalışır.

Suriyanın indiki hakimiyyətini müdafiə edən əsas ölkə isə Türkiyədir. Bəzi proqnozlara əsasən, İsrail Suriyaya qarşı hücumlarını dayandırmasa Türkiyə Suriyaya hərbi yardım edəcək və bununla da İsraillə toqquşma baş verəcək.

Suriyadakı vəziyyəti Sfera.az-a şərh edən politoloq Kənan Novruzov bildirib ki, hazırkı vəziyyətdə İsrail müharibəni dayandırsa, İsraildə siyasi hakimiyyət dəyişikliyi baş verə bilər:

“Baş nazir Benyamin Netanyahu vəzifədən uzaqlaşdırıla, hətta hüquqi məsuliyyətə cəlb oluna bilər. Çünki İsrailə qarşı beynəlxalq səviyyədə təzyiqlər artır. Beynəlxalq ictimai rəydə isə Türkiyə və Ərəb dünyası daha təsirli və nüfuzlu görünür. İkincisi, İsrail daxilində sosial narazılıq getdikcə güclənir. Müharibənin əsas yükü hər zaman sıravi vətəndaşların üzərinə düşdüyü üçün ictimai narazılıq artır.

Üçüncüsü, ölkənin siyasi elitasında fikir ayrılıqları və daxili çəkişmələr dərinləşir. Son dövrlərdə bəzi nazirlər istefa verir, digərlərini isə Netanyahu özü vəzifədən uzaqlaşdırır. Kadr dəyişiklikləri hökumətin daxilində gərginliyin artdığını göstərir. Hökumət daxilində Netanyahuya qarşı çıxan xeyli sayda siyasətçi və məmur var”.

O, Netanyahunun bu gərginliyi azaltmaq və öz hakimiyyətini qorumaq üçün müharibələrdən vasitə kimi istifadə etdiyini qeyd edib:

“Müharibələr dayansa, hakim elita üçün vəziyyət daha da ağırlaşacaq. Məhz bu səbəbdən, İranla toqquşma bitər-bitməz İsrail Suriyaya hücum etdi.
Digər tərəfdən, Suriyada Əhməd Əş-Şaraanın rəhbərlik etdiyi hökumətin möhkəmlənməsi İsraili narahat edir. Çünki Əş-Şaraanın siyasəti əvvəlki Bəşər Əsəd hakimiyyətindən fərqli olaraq, Türkiyəyə qarşı daha konstruktiv və əməkdaşlığa açıqdır. Bu da öz növbəsində Türkiyəyə qarşı terror təhdidinin azalmasına səbəb olur. Əvvəllər terrorçu qrupların bir qismi Suriyada yerləşirdi və Əsəd rejimi onlara dolayı yolla dəstək verirdi. İndi isə vəziyyət dəyişib”.

K.Novruzov əlavə edib ki, Ankaranın Yaxın Şərqdəki mövqeləri güclənir və bu, İsrailin maraqlarına ziddir: “Buna görə də İsrail bölgədə yeni gərginlik ocaqları yaratmağa, Suriyada münaqişəni yenidən alovlandırmağa və Əş-Şaraanın hakimiyyətinin möhkəmlənməsinin qarşısını almağa çalışır".

Fidan Hacızadə
Sfera.az

Suriyada sular durulmur: "Müharibə Netanyahunu hakimiyyətdə saxlayır"