"Danışıqların üçüncü raundunu gözləyirik" - Peskov
Rusiya Prezidenti Vladimir Putinin mətbuat katibi Dmitri Peskov Ukrayna ilə münaqişənin həlli məqsədilə danışıqlar prosesinin davam edəcəyinə ümid etdiklərini bildirib.
Sfera.az rus mediasına istinadən xəbər verir ki, brifinq zamanı Peskov qeyd edib ki, artıq iki çətin danışıqlar raundu keçirilib və indi üçüncü raundun baş tutacağına ümid edirlər:
“Artıq müəyyən işlər görülüb, iki çox çətin raund baş tutub. Biz üçüncünün baş tutacağını və dialoqun davam edəcəyini gözləyirik”.
Kreml sözçüsü həmçinin iyunun 2-də İstanbulda keçirilmiş ikinci raundda Rusiya və Ukrayna nümayəndə heyətlərinin mübadilə etdikləri memorandumların müzakirəsinə başlamağın vacibliyini vurğulayıb.
O bildirib ki, bu, bir gecəyə və ya bir günə həll olunacaq məsələ deyil və çox mürəkkəb proses olacaq.
İyulun 8-də Peskov qeyd edib ki, Rusiya tərəfi Ukraynadan danışıqların növbəti raundu üçün mümkün tarixlərlə bağlı təkliflər gözləyir. Tarix razılaşdırılan kimi ictimaiyyətə açıqlanacaq.
Bundan əvvəl Türkiyənin xarici işlər naziri Hakan Fidan da Ankaranın Ukrayna və Rusiya arasında üçüncü danışıqlar raundunun keçirilməsi üçün Kiyevin mövqeyini gözlədiyini bildirmişdi. Prezident Rəcəb Tayyib Ərdoğan isə daha əvvəl Rusiya Prezidenti Vladimir Putinin Ukraynadakı münaqişəyə son qoymaq istədiyini ifadə etmişdi.
Fidan Hacızadə
Sfera.az
