Dənizdə yeni güc: İngiltərə sualtı qayıların sayını artıracaq

İngiltərə hökuməti müdafiə sahəsində yeni addım ataraq, yalnız hücum silahları ilə təchiz olunacaq və nüvə enerjisi ilə işləyəcək 12 yeni sualtı qayığın hazırlanacağını açıqlayıb. Bu sualtı qayıqların 2030-cu illərin sonlarından etibarən xidmətə verilməsi planlaşdırılır.

Sfera.az xarici mediaya istinadən xəbər verir ki, İngiltərə Müdafiə Nazirliyi bildirib ki, yeni qayıqlar mövcud 7 ədəd sualtı döyüş gəmisinin yerini alacaq.

Hökumət həmçinin yeni bir nüvə başlığının hazırlanmasını nəzərdə tutan proqramın xərclərinin 15 milyard funt sterlinə çatacağını bəyan edib.

Müdafiə naziri Con Hili məsələ ilə bağlı açıqlamasında, artan təhlükələrə və Rusiya təcavüzünə qarşı qətiyyətlə cavab verilməsinin vacibliyini vurğulayıb:

“Beynəlxalq sularda patrul edən son texnologiyalı yeni sualtı qayıqlarımız və Britaniya ərazisində həyata keçirilən nüvə başlığı proqramımızla ölkəmizi həm daxildə təhlükəsiz, həm də xaricdə güclü edirik”, – deyə nazir bildirib.

İngiltərə mediasının məlumatına görə, yeni sualtı qayıqlar İngiltərə, ABŞ və Avstraliya arasında mövcud olan AUKUS təhlükəsizlik ittifaqı çərçivəsində birgə hazırlanacaq. Bu layihə Qərbin Hind-Sakit okean bölgəsində artan geosiyasi gərginliyə cavab olaraq gücləndirilmiş hərbi əməkdaşlığının bir hissəsi kimi qiymətləndirilir.

Bəsti Rəfizadə
Sfera.az