Türkiyə və Misir diplomatik əlaqələrini yenidən bərpa edib.

Sfera.az xəbər verir ki, hər iki ölkə uzun fasilədən sonra qarşılıqlı şəkildə yeni səfirlər təyin ediblər.

Bununla bağlı Türkiyə və Misir birgə bəyanat yayımlayıb. Bəyanatda iki ölkə arasında diplomatik əlaqələrin səviyyəsinin yüksəldilməsinin iki ölkə prezidentlərinin qəbul etdiyi qərara uyğun olaraq həyata keçirildiyi bildirilib. “Bu addım iki ölkə arasında münasibətlərin yenidən normallaşmasına yönəlib və ikitərəfli münasibətlərin türk və Misir xalqlarının maraqlarına uyğun inkişaf etdirilməsi üçün qarşılıqlı iradəni əks etdirir”, - deyə bəyanatda qeyd edilir.

Xatırladaq ki, 2013-cü ildə Misirdə hərbi çevrilişdən sonra Türkiyə ilə siyasi əlaqələr pisləşdi və səfirlər geri çağrıldı. Təxminən 10 il ərzində iki ölkənin diplomatik əlaqələri müvəqqəti işlər vəkili səviyyəsinə həyata keçirilib.

2022-ci ilin noyabrında Türkiyə prezidenti Ərdoğan və Misir prezidenti Sisi Qətərdə keçirilən Dünya Çempionatının açılış ziyafətində ilk dəfə görüşüblər. Bundan sonra diplomatik əlaqələr tədricən normallaşıb.

Vasif