Rusiya “Artsax”ı diriltmək istəyir - Moskvanın yeni məqsədi nədir?

"Rusiya sülh müqaviləsinin bağlanması üçün Bakı ilə Yerevan arasında davam edən danışıqlarda Qarabağdakı separatçı qüvvələrin iştirakını təklif edir. Bu addım regionda sülh prosesinə ciddi təhlükə kimi qiymətləndirilir". 

Sfera.az xəbər verir ki, bunu Milli Cəbhə Partiyasının sədr müavini, siyasi ekspert Məhəmməd Əsədullazadə bildirib. 

M.Əsədullazadənin sözlərinə görə, Ermənistanda separatçı fəaliyyətin yenidən fəallaşması, qondarma “Artsax” prezident seçkiləri kimi proseslər Azərbaycanla sülh sazişinin imzalanmasına əngəl yaradır. O qeyd edib ki, hazırda Yerevanda fəaliyyət göstərən “Artsax” nümayəndəliyi Ermənistanın baş naziri Nikol Paşinyana qarşı siyasi mərkəzə çevrilib:

“Paşinyan ölkəsində yeni “Qarabağ hərəkatına” imkan verilməyəcəyini bəyan etsə də, separatçılara fəaliyyət azadlığı verilməsi bunun əksini göstərir”. 

Ekspertə görə, keçmiş prezidentlər Robert Köçəryan və Serj Sarkisyan Qarabağ məsələsindən siyasi alət kimi istifadə etməyə davam edir.

M.Əsədullazadə hesab edir ki, Rusiya-Ukrayna müharibəsində Qərbin zəif mövqeyi Moskvaya danışıqlarda üstünlük qazandırıb və bu, Paşinyanın qərbyönümlü siyasətinə təsir göstərir. Onun sözlərinə görə, Rusiya Yerevana təzyiqləri artırır və Paşinyan seçkilər öncəsi Rusiya ilə konfrontasiyadan yayınmağa çalışır.

Ekspert əlavə edir ki, Rusiyanın məqsədi Qarabağ münaqişəsinin tam başa çatmasına imkan verməməkdir. Moskva bu məqsədlə sülh danışıqlarının Moskvada keçirilməsini və “Artsax” nümayəndələrinin də iştirakını təmin etməyə çalışır. Bu isə danışıqların nəticə verməməsinə səbəb ola bilər.

Əsədullazadə bildirib ki, Rusiya xarici işlər naziri Sergey Lavrovun Ermənistana səfəri də bu strategiyanın tərkib hissəsidir və Paşinyanın bu plana qoşulması regionda sülhün pozulmasına, Avropa İttifaqı ilə əlaqələrin zədələnməsinə yol aça bilər. Ekspertə görə, Paşinyan seçkiyə qədər Rusiyaya yaxın görünməyə çalışacaq, lakin yenidən hakimiyyətə gəldikdən sonra qərbyönümlü siyasətini davam etdirəcək:

"Çünki Rusiyanın orbitinə tam qayıdış onun üçün siyasi iflasa səbəb ola bilər".

Bəsti Rəfizadə
Sfera.az