Böyük Britaniya, Fransa və Kanada İsrailin Qəzza zolağında hərbi əməliyyatlarını dayandırmaması və humanitar yardıma qoyulan məhdudiyyətləri aradan qaldırmaması halında ona qarşı konkret tədbirlər görməyə hazır olduqlarını bildiriblər.

Xəbərdarlığın hər hansı təsiri olacaqmı? İsrailə qarşı hansı tədbirlər görülə bilər?

Mövcud suallarla bağlı Sfera.az-a açıqlama verən millət vəkili Hikmət Babaoğlu İsrail-HƏMAS müharibəsinin nəticəsi olaraq bu gün Qəzzada yaşananların humanitar baxımdan mühüm əhəmiyyət kəsb etdiyini bildirib.

Onun sözlərinə görə, məsələnin əsas tərəfi HƏMAS-ın indiyədək dəfələrlə İsrailin mülki ərazilərinə hücum edərək ələ keçirdiyi əsirləri geri qaytarmamasıdır:

“Bu isə qarşıdurmanın uzanmasına səbəb olur. Ona görə də bu münaqişənin sona çatması üçün ortaq razılaşma əldə olunması zəruridir. Nəticə etibarilə burada qalib tərəf yoxdur. Əksinə, Orta Şərqdə, xüsusilə də İsrail-Fələstin münasibətlərində vəziyyət daha da mürəkkəbləşir. Təsadüfi deyil ki, Fələstin rəhbəri Mahmud Abbas HƏMAS-a çağırış edərək İsrail əsirlərinin dərhal azad olunmasını tələb etmişdir”.

Deputat qeyd edib ki, bu addım tezliklə atılarsa, bölgədə sülh daha yaxın perspektivdə mümkün ola bilər:

“Lakin həmin coğrafiyada sabitlik yaratmaq asan deyil. Çünki bu ərazi qədim Kənan və Aramiya torpaqlarında minillərdir davam edən münaqişələrin mərkəzidir. Bu səbəbdən də uzunmüddətli və davamlı bir sülh hələlik real görünmür. Əgər biz siyasi təhlil və proqnozlarda tarixi müqayisələrə əsaslanan yanaşmalardan istifadə edərək indiki hadisələri bu baxımdan analiz etsək, aydın olar ki, ərəb-İsrail qarşıdurmaları təkcə keçmişin deyil, həm də bu günün reallığıdır və hələ də davam edəcək”.

H.Babaoğlu bu səbəbdən Fransa, Böyük Britaniya və Kanada kimi dövlətlərin İsrailə təsir imkanlarının məhdud olduğunu vurğulayıb.

Müsahibimizin fikrincə, digər tərəfdən, İsrailin qərarlarına bilavasitə və ya dolayı şəkildə təsir edə biləcək yeganə güc mərkəzi ABŞ-dir:

“Üstəlik, ABŞ və İsrailin eyni siyasi xətt üzrə hərəkət etməsi müşahidə olunur. Məhz bu səbəbdən, Böyük Britaniya, Fransa və Kanada kimi ölkələr, nə qədər istəsələr də, İsrailin qərarlarına ciddi müdaxilə edə bilməzlər. Lakin humanitar yardım məsələlərində dialoq və əməkdaşlıq yolu ilə müəyyən razılaşmalar əldə etmək mümkündür”.

Fidan Hacızadə
Sfera.az

İsrailə qarşı yeni cəbhə açılır? - AÇIQLAMA