\"Rusiya ilə Fransa anlaşmaya gedə bilər, çünki Azərbaycan-Ermənistan sülhü...\" - MÜHÜM AÇIQLAMA
![\](https://sfera.az/photo/orginal/2024/04/03/1712146272_azerbaycan-ermenistan-serhedi1.jpg)
“Fransanın Azərbaycana qarşı mövqeyi tamamilə qərəzli, məntiqsiz və beynəlxalq hüquqa ziddir”.
Bu sözləri Sfera.az-a açıqlamasında Respublikaçı Alternativ Partiyasının icraçı katibi Natiq Cəfərli deyib.
O bildirib ki, hazırda Cənubi Qafqazda sülhün bərqərar olmasına mane olan ölkələrdən biri Rusiyadır:
“Azərbaycan-Türkiyə müttəfiqliyi və Bakının atdığı beynəlxalq hüquqa uyğun addımlar, ərazi bütövlüyümüzün tam bərpası Kremlin bölgəmizə təsirlərini xeyli azaltdı, bir də ayıldılar ki, NATO dövləti olan qardaş Türkiyə Cənubi Qafqazda artıq oyun qurucudur, ciddi güc mərkəzidir. Rusiya bilir ki, sülh müqaviləsi imzalanan kimi bölgədəki təsirləri azalacaq. Rusiyadan boşalacaq yeri ABŞ və Britaniya tuta bilər, bu Moskvaya da sərf etmir, ona görə də, Fransa ilə müəyyən anlaşmalara gedə bilər”.
REAL-ın icraçı katibi vurğulayıb ki, bu gün kim Cənubi Qafqazda dayanıqlı sülhə mane olan addımlar atırsa, deməli Kremlin əlinə oynayır:
“Siyasətdə hər şey heç də göründüyü kimi deyil, daha alt qatlar, dərin maraqlar və anlaşmalar olur. Fransa bu gün faktiki Rusiya ilə birgə davranır, sözdə “dava” etsələr də, bir-birinin maraqlarına “oynayırlar”. Bizim XİN məsələni məhz belə təqdim etməyi bacarmalıdır, bu təqdimat Fransanın əlini xeyli zəiflədəcək”.
Firuzə Əliyeva