İrəvandan Moskvanı qıcıqlandıracaq PLAN: “İran və Türkiyə sərhədlərində…” 

Ermənistan parlamenti Avropa İttifaqının ölkə ərazisində “Mülki missiyası”nın fəaliyyətini ratifikasiya edib.

Sfera.az-ın məlumatına görə, bununla bağlı danışan politoloq Məhəmməd Əsədullazadə deyib ki, sözügedən missiya bundan sonra təkcə Azərbaycanla sərhəddə deyil, Türkiyə və İranla sərhəd ərazilərinə də baş çəkə bilər:

“Türkiyə və İranla sərhəddin Rusiya sərhədçiləri tərəfindən mühafizə edildiyini nəzərə alsaq, bu planın birbaşa Moskvaya qarşı yönəlməsi aydın görünür. Avropa ittifaqının "Mülki missiyası”nın tərkibində, əsasən, Fransa kəşfiyyatçıları üstünlük təşkil edir. Ümumi götürdükdə, bu missiyanın fəaliyyəti Azərbaycana qarşı yönəlməyib. Əsasən, Ermənistanda Rusiyanın fəaliyyətinə yönəlib”.

Ekspert bildirib ki, Avropa İttifaqının “Mülki missiyası” Azərbaycanın Ermənistanla sərhəddə hər hansı təhlükə yaratmadığını hesabatlarında qeyd edib:

“Hazırda Azərbaycan Ermənistanla danışıqlar aparır. İrəvan tərəfindən Qazaxın anklav olmayan dörd kəndinin Azərbaycana qaytarılması üçün real addımların atılması gözlənilir. Dörd kənd geri veriləndən sonra delimitasiya və demarkasiya prosesi aparılacaq. İki ölkə arasında real sülh üçün mümkün şərait formalaşıb. Sülh müqaviləsi bağlandıqdan sonra Avropa İttifaqının "Mülki missiyası" Azərbaycanla sərhəddə müşahidəni sona çatdıracaq”.

M.Əsədullazadə qeyd edib ki, Ermənistan ordusunda Rusiyaya bağlı kifayət qədər qüvvələr var:

“Bu qüvvələr Azərbaycanla sərhəddə təxribatlar törədə bilərdilər. Avropa ittifaqının “Mülki missiyası” Ermənistan tərəfindən bu təxribatçı qüvvələrin fəaliyyətini neytrallaşdırıb. Ümumiyyətlə, Avropa İttifaqı Azərbaycanla Ermənistan arasında hərbi eskalasiyada maraqlı deyil”.

Günay