"Getməyi düşünürəm..." - Kanadanın Baş naziri istefa verəcək? 

Kanadanın Baş naziri Castin Trüdo işindən şikayət edib. 

Sfera.az xəbər verir ki, rəhbəri olduğu Kanada Liberal Partiyası qarşıdan gələn seçkilər öncəsi sorğularda zəif nəticələr əldə edərkən, 52 yaşlı liderdən 2015-ci ildən bəri tutduğu postunu tərk etmək fikrində olub-olmadığı soruşulub.

Trüdo gülərək bildirib ki, getməyi hər gün düşünür:

"Hər gün getməyi düşünürəm. Gördüyüm iş çılğın işdir, şəxsi fədakarlıq tələb edir. Əlbəttə ki, bu, çox çətindir, bəzən yaxşı deyil. Tanrım, getdiyimiz yol o qədər risklidir ki, dünya demokratları o qədər hücuma məruz qalır ki...".

"Radio-Canada"ya danışan Trüdo əlavə edib ki, o, 2025-ci ilin oktyabrında keçiriləcək seçkilərə qədər vəzifəsini davam etdirmək niyyətindədir. 

Baş nazirlər üçün müddət məhdudiyyətinin olmadığı Kanadada bu vəzifəyə layiq görülənlər hökumətin etimad səsverməsi aldığı müddətcə öz vəzifələrini davam etdirə bilərlər.Son sorğulara görə, Kanada Mühafizəkarlar Partiyası ictimai dəstək baxımından Trüdonun partiyası olan Liberallar Partiyasından öndədir.

Mühafizəkarlar təxminən 10 il əvvəl hakimiyyəti təhvil verdikləri liberalların tətbiq etdiyi karbon vergisindən qurtulmağı, büdcə kəsirini azaltmağı, evsizliyi həll etməyi və cinayət nisbətlərini azaltmağı vəd edirlər.

Aprelin 1-də yenidən artırılacaq karbon vergisini müdafiə edən Trüdo son müsahibəsində bütün çağırışlara baxmayaraq, geri addım atmayacaqlarını bildirib:

"Bu gün siyasətdə vergilərə və konkret tədbirlərə hücum etmək çox asandır. Mən siyasətə şəxsi məqsədlərim və ya populyar olmaq üçün deyil, cəmiyyətə xeyir vermək üçün gəlmişəm".

İnci