Ukrayna Prezidenti Volodimir Zelenskinin milli təhlükəsizlik müşaviri Oleksiy Danilov Makronu Çinin köməyi ilə sülh sazişi şərtləri hazırlamaq cəhdlərini dayandırmağa çağırıb. 

Sfera.az  bildirir ki, bu barədə o, “The Telegraph”a açıqlamasında deyib.

“Makron Ukrayna xalqının arxasından iş görməyə və Krım kimi əraziləri müzakirə edə biləcəyinə inanırsa, çox yanılır. Mən Makrona Fransanın bir hissəsindən imtina etməyi təklif edirəm. O, bunu edə bilərmi? Bordonu və ya Fransanın digər bir hissəsini başqa ölkəyə versin”, - Danilov bildirib.

Nəşr Fransa prezidentinin keçən həftə xarici siyasət üzrə müşaviri Emmanuel Bonneyə gələcək sülh danışıqları üçün Pekinlə işləməyi tapşırdığını xatırladıb. Sözügedən xəbər ictimaiyyətin qəzəbinə səbəb olub. Qeyd edilib ki, bu strategiya Kiyev hökümətinin əvvəlcədən xəbəri olmadan hazırlanıb. Danilov məsələ ilə bağlı fikirlərini belə davam etdirib:

“Makron söhbət yalnız Rusiya və Fransa arasındakı məsələlərdən getdiyi halda, onlarla sülh sazişi haqqında danışa bilər. Ukraynasız isə heç kim heç nə ilə bağlı danışıqlar aparmayacaq”.

Danilov 2024-cü il prezident seçkiləri ərəfəsində ABŞ-nin dəstəyinin azalması ehtimalı ilə bağlı sualı isə bu cür cavablandırıb: “Ukrayna başqa ölkələrin siyasi həyatına qarışmır”.

O həmçinin, 2014-cü ildə Rusiya tərəfindən qeyri-qanuni ilhaq edilmiş Krımı və Baxmut şəhərini Ukrayna qüvvələrinin hədəfləri kimi göstərib. Təhlükəsizlik müşaviri bildirib ki, Ukrayna artıq Kiyevin beynəlxalq tərəfdaşları ilə gizli sövdələşmələr əsasında “Himars”dan ibarət uzaqmənzilli silahlar da alıb.

Günay Rəsulqızı