Sağlam yaşlanmağın 10 sirri
Yaşlanmaq həyatın təbii prosesidir. Ancaq bu dövrü sağlam, enerjili və aktiv keçirmək insanın həyat tərzindən də asılıdır.
Sfera.az xəbər verir ki, mütəxəssislər sağlam yaş almağın 10 əsas qaydasını açıqlayıb.
1. Həyat tərzinə diqqət edin
Uzun və sağlam ömürdə genetika ilə yanaşı, həyat tərzi də mühüm rol oynayır. Ailəsində diabet, ürək-damar xəstəlikləri, xərçəng və ya osteoporoz olan şəxslər risklərini əvvəlcədən bilməli, mütəmadi tibbi müayinələrdən keçməlidirlər.
2. Təbii qidalara üstünlük verin
Gündəlik qidalanmada tam taxıllar, paxlalılar, tərəvəz və meyvələr, eləcə də yumurta, süd məhsulları, ət və balıq kimi qidalara yer verilməlidir. Liflə zəngin məhsullar həzm sisteminin fəaliyyətini dəstəkləyir.
3. Meyvələri ölçülü yeyin
Meyvələr vitamin, mineral, antioksidant və lif mənbəyidir. Lakin onların da miqdarına diqqət etmək lazımdır. Şəkərli meyvələr ölçülü istehlak edilməli, alma, armud, kivi və çiyələk kimi liflə zəngin seçimlərə üstünlük verilməlidir. Diabeti olan şəxslər meyvə seçimi və porsiyalarla bağlı daha diqqətli olmalıdırlar.
4. Əzələ və sümük sağlamlığını qoruyun
Yaş artdıqca əzələ kütləsinin azalması əsas problemlərdən birinə çevrilir. Bunun qarşısını almaq üçün balanslı qidalanmaq və yaşa, fiziki vəziyyətə uyğun müntəzəm idmanla məşğul olmaq vacibdir. Xroniki xəstəliyi olanlar məşqlərə başlamazdan əvvəl həkimlə məsləhətləşməlidirlər.
5. Hormon dəyişikliklərini nəzərə alın
Yaş artdıqca hormon balansı dəyişir və bəzi hormon göstəriciləri yaşa uyğun qiymətləndirilməlidir. Xüsusilə qalxanabənzər vəz xəstəliklərində müalicə həkim nəzarətində aparılmalıdır. Yanlış tənzimlənən hormon müalicəsi sümük sağlamlığına və ürəyin fəaliyyətinə mənfi təsir göstərə bilər.
6. Səhər rutini yaradın
Günə müntəzəm və sağlam vərdişlərlə başlamaq faydalıdır. İlıq su içmək, yüngül hərəkətlər etmək və ya qısa gəzintiyə çıxmaq səhər rutininin bir hissəsi ola bilər. Əsas məsələ orqanizmin ehtiyaclarına uyğun, davamlı vərdişlər formalaşdırmaqdır.
7. Yuxu rejiminə əməl edin
Keyfiyyətli yuxu sağlam yaşlanmanın vacib şərtlərindəndir. Hər gün eyni saatlarda yatıb oyanmaq və kifayət qədər yatmaq tövsiyə olunur. Yuxunun az və ya həddindən artıq olması maddələr mübadiləsinə və hormon balansına mənfi təsir göstərə bilər.
8. Psixoloji sağlamlığınızı qoruyun
Uzunmüddətli stress və ağır emosional sarsıntılar sağlamlığa mənfi təsir edə bilər. Sevdiklərinizlə vaxt keçirmək, ailə və dostlarla ünsiyyəti qorumaq, sosial fəaliyyətlərdə iştirak etmək və narahatlığı idarə etməyi öyrənmək həm psixoloji, həm də fiziki sağlamlıq üçün əhəmiyyətlidir.
9. Dəri sağlamlığına diqqət edin
Dərinin sağlamlığı yalnız kosmetik vasitələrdən asılı deyil. Keyfiyyətli yuxu, kifayət qədər su qəbulu və C vitamini ilə zəngin qidalanma da vacibdir. Sitrus meyvələri, bibər və yaşıl yarpaqlı tərəvəzlər C vitamini mənbəyidir. Vitamin əlavələri isə ehtiyac olduqda və həkim məsləhəti ilə qəbul edilməlidir.
10. Hərəkətsiz qalmayın
Həftədə ən azı 150 dəqiqə orta intensivlikli fiziki fəaliyyətlə məşğul olmaq tövsiyə edilir. Sürətli gəzinti, üzgüçülük və velosiped sürmək uyğun seçimlərdir. Siqaretdən və alkoqoldan uzaq durmaq, stressi idarə etmək və sağlam çəkini qorumaq da sağlam yaşlanmağa kömək edir.
