Uşaqlarda yayılan sirli xəstəlik - Azyaşlıları hədəfə alan infeksiya nədir?
Son zamanlar uşaqlar arasında qusma, yüksək hərarət və qarın ağrısı ilə müşaiyət olunan xəstəlik yayılıb. Bu əlamətlər adətən birdən-birə başlayır və bəzi hallarda uşaqlar qida qəbulundan imtina edir, halsızlıq və süstlük müşahidə olunur.
Xəstəliyin yaranma səbəbi ilə bağlı Sfera.az- a açıqlama verən professor, tibb elmləri doktoru Adil Qeybulla hazırda epidemioloji vəziyyətin bir qədər qarışıq olduğunu bildirib.
Professorun sözlərinə görə, uşaqlar arasında yüksək hərarət, qusma, qarın ağrısı və ishalla müşayiət olunan halların əksəriyyəti adətən rotavirus infeksiyası ilə əlaqəli olur:
“5 yaşına qədər olan uşaqların demək olar ki, hər biri bu infeksiyaya heç olmasa bir dəfə yoluxur. Hazırkı vəziyyətdə bu cür əlamətlər göstərən azyaşlıların əksəriyyəti ev şəraitində müalicə olunur. Bəzi valideynlər məlumatlı olmasa da, düşünürəm ki, bu vəziyyətdən əziyyət çəkənlərin sayı kifayət qədərdir".
A.Qeybulla bu cür hallarda uşaqlarda maye və elektrolit itkisinin çox olduğunu qeyd edib.
O əlavə edib ki, buna görə də onlara “Rehidron” kimi elektrolit tərkibli məhlullar verilməlidir:
"Valideynlər bu preparatı evdə rahatlıqla tətbiq edə bilərlər. Əgər bədənin temperaturu yüksəkdirsə, onu salmaq vacibdir. Lakin hərarət 38°C civarında olduqda müdaxiləyə ehtiyac görmürəm. Əgər temperatur 39–40°C-yə qədər qalxarsa, bu zaman mütləq şəkildə hərarətsalıcı tədbirlər görülməlidir. Ən önəmlisi isə uşağın bədənindəki maye və elektrolit balansının qorunmasıdır. Qalan bütün tədbirlər isə yalnız həkim məsləhəti ilə aparılmalıdır. Həmçinin bol maye qəbulu da olduqca vacibdir”.
Fidan Hacızadə
Sfera.az
