Bu yaşdan tez smartfon istifadəsi zərərlidir - Araşdırma

13 yaşından əvvəl smartfonlardan istifadə edən uşaqlarda gələcəkdə ciddi psixi sağlamlıq problemləri müşahidə olunur. 

Sfera.az xəbər verir ki, alimlər bu səbəbdən uşaqların qadcet və sosial şəbəkələrə çıxışına qlobal məhdudiyyətlər qoyulmasını təklif edirlər.

Araşdırma 163 ölkədə 2 milyon nəfər arasında aparılıb. Nəticələrə görə, erkən smartfon istifadəsi intihar düşüncələri, emosional pozğunluq, özünə hörmətin azalması və reallıqdan uzaqlaşma ilə əlaqəlidir. Bu təsirlər xüsusilə qızlarda güclü olur.

Tədqiqatın müəllifi Tara Tiaqarajan problemin cihazın özündə deyil, onun istifadəsinin nəticələrində olduğunu bildirir. Belə uşaqlarda yuxu pozuntuları, kiber zorakılıq və ailə münasibətlərində gərginlik daha çox olur.

Sosial psixoloq Conatan Haidt də bu nəticələri dəstəkləyərək sosial şəbəkələrə girişin 16 yaşdan əvvəl olmamasını tövsiyə edir.

Mütəxəssislər valideynlərə təşvişə düşmədən tədbir görməyi tövsiyə edir.

Əgər uşaq artıq smartfona sahibdirsə, valideynlər nəzarət funksiyalarından istifadə edə, proqramları silə və ya cihazı düyməli telefonla əvəz edə bilərlər.
Ən önəmlisi isə uşaqla açıq dialoq qurmaq və onun rifahı üçün qərarları yenidən nəzərdən keçirməkdir.

Fidan Hacızadə
Sfera.az