Xərçəng riskini azaltmağa kömək edən qidalar – Həkimdən tövsiyələr
Düzgün qidalanma xərçəng də daxil olmaqla bir sıra xəstəliklərin riskinin azaldılmasında mühüm rol oynaya bilər. Mütəxəssislər gündəlik rasionda antioksidant və iltihabəleyhinə xüsusiyyətlərə malik məhsullara üstünlük verməyi tövsiyə edirlər.
Sfera.az xəbər verir ki, məşhur həkim və Angiogenez Fondunun rəhbəri Uilyam Li xərçəng riskinin azalmasına kömək edə biləcək bir sıra qidaları açıqlayıb.
Mütəxəssis pomidoru xüsusilə qeyd edir. Onun tərkibindəki likopen antioksidant xüsusiyyətə malikdir. Pomidorun bişirilməsi isə likopenin orqanizm tərəfindən mənimsənilməsini artıra bilər.
Yaşıl çay, sitrus meyvələri, qaragilə, cəfəri, qoz-fındıq, soya məhsulları və tünd şokolad da flavonoidlərlə zəngin qidalar sırasındadır.
Li həmçinin tərəvəz, meyvə, tam taxıl, qoz-fındıq və zeytun yağının üstünlük təşkil etdiyi pəhrizi faydalı qidalanma modeli kimi göstərir.
Mənbədə qeyd olunur ki, 56 min nəfərin iştirakı ilə aparılan 20 illik araşdırmada gündə ən azı 500 mq flavonoid qəbul edən şəxslərdə bəzi xəstəliklərin, o cümlədən xərçəngin inkişafı ilə bağlı riskin daha aşağı olduğu müşahidə edilib.
Bundan başqa, brokoli, gül kələmi və Brüssel kələmi kimi tərəvəzlərin tərkibindəki sulforafan, zərdəçalın tərkibindəki kurkumin, həmçinin bəzi göbələk növlərinin bioloji aktiv maddələri də xərçənglə əlaqəli proseslərə mümkün təsirləri baxımından araşdırılır.
Mütəxəssislər bildirirlər ki, heç bir qida xərçəngi müalicə etmir. Sağlam və balanslı qidalanma isə xəstəlik riskinin azaldılmasına kömək edən amillərdən biridir./moderator
