Dünyanın müxtəlif ölkələrində 100 ildən çox yaşamış insanların sıx məskunlaşdığı bölgələrdə aparılan tədqiqatlar maraqlı nəticələr ortaya çıxarıb. Tədqiqatlar nəticəsində məlum olub ki, uzunömürlülüyün sirri təkcə genetika ilə bağlı deyil, daha çox həyat tərzi və qidalanma vərdişləri ilə əlaqəlidir.

Sfera.az bu araşdırmaya istinadən xəbər verir ki, bəzi insanların uzun ömür sürməsində ortaq bir qidalanma modeli var.

Uzunömürlü insanlar gündəlik rasionlarının 90 faizini bitki əsaslı qidalardan alırlar. Menyularında əsas yer tutan məhsullar arasında paxlalılar (xüsusilə lobya, mərcimək, noxud), mövsümi tərəvəzlər, meyvələr, qəhvəyi düyü və yulaf kimi tam taxıllar var.

Uzunömürlülər əti həftədə 1-2 dəfə və çox kiçik miqdarda istehlak edirlər. Əvəzində zülal tələbatı əsasən paxlalılar və qoz-fındıq kimi faydalı yağlı toxumlardan alınır.
Hazır qidalardan, "fast-food"lardan uzaq duran bu insanlar evdə bişirilmiş, az duzlu və az şəkərli yeməklərə üstünlük verirlər. Onların süfrəsində konservləşdirilmiş və işlənmiş məhsullara rast gəlinmir.

Yaponiyada 80% doyunca yemək prinsipi uzunömürlülüyə mühüm təsir göstərir. Bu qayda mədəyə artıq yük düşməsinin qarşısını alır və orqanizmi daha uzun müddət gümrah saxlayır.

Əsas yeməklər günorta saatlarında yeyilir. Axşam yeməyi isə çox yüngül olur. Gündəlik olaraq su və bitki çayları qəbul edilir. Xüsusilə yaşıl çay, dağ bitkiləri çayları və qırmızı şərab (az miqdarda) antioksidant mənbəyi kimi seçilir.

Mütəxəssislər bildirir ki, bu sadə qidalanma prinsiplərini həyatımıza daxil etməklə sağlam yaş almaq və ömrü uzatmaq mümkündür.

Fidan Hacızadə
Sfera.az

Uzunömürlü insanların sirri açıldı: Bu məhsullarla qidalanırlar