İstilər ölüm riskini artırır - Bu ölkədə 1180 nəfər dünyasını dəyişdi

Son iki ayda İspaniyada güclü istilər səbəbindən 1180 nəfər həyatını itirib. Ekologiya Nazirliyi ötən ilin eyni dövrü ilə müqayisədə istilərə görə ölüm sayının təxminən on dəfə artdığını açıqlayıb. 2024-cü ildə eyni dövrdə ölkədə yalnız 114 nəfər istilər nəticəsində dünyasını dəyişmişdi.

Sfera.az xarici mediaya istinadən xəbər verir ki, istilərə görə ölümlər mayın 16-dan iyulun 13-dək qeydə alınıb. 

Bu dövr şiddətli istilik dalğaları ilə əlamətdar olub, temperatur 40 dərəcəni keçib. Ən çox təsirlənən bölgələr İspaniyanın şimalındakı Qalisiya, La Rioja, Asturiya və Kantabriya olub.

Ölənlərin böyük əksəriyyəti 65 yaşdan yuxarı, yarıdan çoxu isə qadınlardır.

Nazirlikdən verilən məlumata görə, bu müddət ərzində 76 dəfə “həddindən artıq isti” ilə bağlı qırmızı siqnal verilib. Keçən il bu rəqəm sıfır idi. İyulun ilk həftəsində də ölənlərin sayında kəskin artım qeydə alınıb.

Yeri gəlmişkən, iyulun 9-da dərc edilən elmi təhlilə əsasən, Avropanın 12 şəhərində cəmi 10 gün ərzində təxminən 2300 insanın istidən öldüyü müəyyən olunub. 

Vasif