Almaniya kansleri Olaf Şolz və ABŞ prezidenti Co Bayden məxfi danışıqlar aparacaq.

Sfera.az bildirir ki, bu barədə “The Guardian” məlumat yayıb. Qeyd olunub ki, hər iki ölkə lideri bu gün Vaşinqtonda bir araya gələcək. Buna səbəb isə Çinin Rusiyaya silah verə biləcəyi ilə bağlı artan narahatlıqlardır.

Məlumata görə, Almaniya kansleri gözlənilmədən bir günlük səfər məqsədilə dünən gecə yola düşüb. Yüksək rütbəli ABŞ rəsmisinin sözlərinə görə, Ağ Evdə jurnalistlərin iştirak etməyəcəyi toplantıda Bayden və Şolz bir saat boyu görüşəcəklər.

“Bu isə hər iki şəxsə Ukrayna prezidenti Volodimir Zelenski ilə müvafiq son görüşlər və müharibə vəziyyəti ilə bağlı fikir mübadiləsi aparmağa imkan verəcək. Hər iki lider bunun işçi səviyyəli görüş olmasını istəyib”.

Xatırladaq ki, son günlər Pekinin Rusiyaya silah göndərməsi məsələsi Qərb mediasının əsas müzakirə obyektinə çevrilib. ABŞ rəsmiləri, o cümlədən Almaniya kansleri çıxışları zamanı Çinə xəbərdarlıq edib.

Günay Rəsulqızı