Vaxtsız ölüm, yoxsa məsuliyyətsizlik? – Mütəxəssisdən ürək xəstəlikləri ilə bağlı XƏBƏRDARLIQ
Azərbaycanda ürək və qan-damar xəstəlikləri üzrə ölüm sayında artım müşahidə olunur.
Bu barədə Sfera.az-a Bakı Baş Səhiyyə Mərkəzindən məlumat verilib.
Qeyd olunub ki, təkcə yanvar ayı ərzində 901 ölüm hadisəsindən 613-ü ürək və qan-damar xəstəlikləri səbəbindən baş verib. Bu isə ümumi ölüm hadisələrinin 68%-nə bərabərdir.
Həkim-kardioloq Ramella Quliyeva isə saytımıza açıqlamasında deyib ki, ürək və qan-damar xəstəlikləri səbəbi ilə dünyasını dəyişənlərin böyük əksəriyyəti uzun müddət ürəyində yaranmış problemdən xəbərsiz olur:
“Bəzən ürəklə bağlı ölümləri insanlar “vaxtsız gələn ölüm” hesab edirlər. Əslində belə deyil. Bu xəstəliklərdə erkən diaqnoz önəmlidir. İnsanların çoxu buna o qədər də əhəmiyyət vermir. Vaxtında profilaktik müayinələrdən keçmir, ilkin tibbi xidmətlərdən müntəzəm yararlanmır. Halbuki, erkən diaqnozun qoyulması onları həyati təhlükələrdən xilas edə bilər. Ürək nahiyəsində küt ağrılar, sinədə göynəmə, təngnəfəslik, tez yorulma halları müşahidə edilərsə, dərhal ailə həkimlərinə müraciət edilməlidir”.
Mütəxəssis bildirib ki, sahə həkimləri həmin şəxsləri müvafiq tibbi müayinələrdən keçirir, lazım olduğu təqdirdə həkim-kardioloqa yönləndirir:
“Yaxşı olardı ki, ürəkdə müəyyən ağrılar baş verməsə belə, insanlar hər ehtimala qarşı 6 aydan bir və ya ildə bir dəfə profilaktik müayinələrdən, ümumi yoxlanışlardan keçsin”.
Türkan
