Lukaşenkonun Çin səfərinin əsl məqsədi bilindi – Silah alıb Rusiyaya ötürmək...
ABŞ-ın Müharibə Araşdırmaları İnstitutunun məlumatına görə, Çinin Belarus vasitəsilə Rusiyaya texnikalar ötürməsi mümkündür. Bildirilib ki, Belarus və Çin liderləri arasında imzalanan 16 bəndlik sənədlər paketi Rusiyaya yardımı Belarus vasitəsilə ötürməyə, beləliklə, Rusiyanın sanksiyalardan yayınmasına şərait yarada bilər.
Bununla bağlı Sfera.az-a danışan siyasi şərhçi Kənan Novruzov deyib ki, İranın Rusiyaya dəstək imkanları getdikcə azalır və buna əsas səbəb ölkə daxilindəki etirazlardır:
“Müxtəlif kəşfiyyat məlumatlarına görə, İran istehsallı “Şahed” PUA-larının Rusiyaya tədarükündə də azalma var. Bu isə o deməkdir ki, Rusiya özünə alternativ silah tədarükçüsü axtarışındadır. Şübhəsiz ki, belə alternativlərdən birincisi məhz Çindir. Həmçinin, Rusiya Prezidenti Vladimir Putin müharibəyə qoşulmaq üçün Belarusa təzyiq edir. O, ən azından Belarusdan ikinci cəbhənin açılmasını istəyir. Minsk isə mümkün qədər bu təzyiqlərə müqavimət göstərməyə çalışır. Çünki Belarus müharibəyə qoşularsa, Qərbin ağır sanksiyalarına məruz qalacaq”.
Müsahibimiz qeyd edib ki, deyilənlərə rəğmən, Lukaşenko Putinin könlünü xoş tutmalıdır:
“O, hansısa yolla Moskvaya dəstəyini göstərməlidir. Bu mənada ABŞ-ın Müharibə Araşdırmaları İnstitunun proqnozunu inandırıcı hesab etmək olar. Başqa bir məqam isə ondan ibarətdir ki, Pekin də Rusiyaya silah verməkdə maraqlı deyil. Bu zaman Çin təzyiqlərə məruz qala bilər. Ona görə də silahların Belarus vasitəsilə Rusiyaya ötürülməsi Çinə də sərf edir. Yaxın gələcəkdə Çin və Rsuiya arasında təmasların intensivləşməsi, həmçinin Belarusdan Rusiyaya silah ötürülməsi mümkündür”.
Günay Rəsulqızı
