Tez-tez yaranan ağız yaralarına diqqət!
Uşaqlarda zaman-zaman yaranan ağız yaraları, adətən, qısa müddətdə sağalır. Lakin ağız yaralarının tez-tez təkrarlanması və uzun müddət davam etməsi bəzi sağlamlıq problemlərindən xəbər verə bilər.
Sfera.az xəbər verir ki, mütəxəssislərin sözlərinə görə, uşaqlarda təkrarlanan ağız yaralarının yaranmasına vitamin və mineral çatışmazlığı, stress, ağız boşluğunda yaranan travmalar və bəzi sistem xəstəlikləri səbəb ola bilər.
Ağız yaraları uşaqların yemək yeməsini, danışmasını və gündəlik fəaliyyətlərini çətinləşdirə bilər. Çox vaxt öz-özünə sağalan ağız yaraları təkrarlanmağa başladıqda isə problemin əsas səbəbinin araşdırılması tövsiyə olunur.
Uşaq sağlamlığı və xəstəlikləri üzrə mütəxəssis, uzm. dr. Serpil Değirmenci uşaqlarda təkrarlanan ağız yaralarının diqqətdən kənarda saxlanılmamalı olduğunu bildirib. Onun sözlərinə görə, bu vəziyyət bəzi vitamin çatışmazlıqlarından tutmuş müxtəlif xəstəliklərə qədər bir sıra səbəblərlə əlaqəli ola bilər.
Mütəxəssislər təkrarlanan ağız yaralarının əsas səbəbləri arasında dəmir, B12 vitamini, fol turşusu və sink çatışmazlığını qeyd edirlər. Bu maddələrin orqanizmdə kifayət qədər olmaması ağız yaralarının daha tez-tez yaranmasına səbəb ola bilər.
Bundan əlavə, stressin də ağız yaralarının əmələ gəlməsini artırdığı bildirilir. Xüsusilə imtahan dövründə təzyiq və gərginlik yaşayan uşaqlarda ağız yaralarının daha çox müşahidə oluna biləcəyi vurğulanır.
Ağız yaralarının yaranması hər zaman daxili xəstəliklərlə əlaqəli olmur. Sərt diş fırçasından istifadə, dişlərin düzgün fırçalanmaması, yanağın və ya dodağın dişlənməsi ağız boşluğunda qıcıqlanma və yaralara səbəb ola bilər.
Bəzi diş məcunlarının tərkibində olan SLS (Sodium Lauryl Sulfate) maddəsinin də həssas uşaqlarda ağız yaralarının yaranmasını tətikləyə biləcəyi qeyd edilir. Bu səbəbdən ağız yaralarına meyilli uşaqlar üçün uyğun diş məcununun seçilməsi vacibdir.
Mütəxəssislər bildirirlər ki, uşaqlarda təkrarlanan ağız yaralarının səbəbinin vaxtında müəyyənləşdirilməsi düzgün müalicənin planlaşdırılması və mümkün sağlamlıq problemlərinin erkən aşkarlanması baxımından mühüm əhəmiyyət daşıyır.
Mənsumə
