Kadir İnanırın mirası gündəm oldu: Həyat yoldaşı 25 “Rolex” saat iddiasına cavab verdi
Türkiyəli aktyor Kadir İnanırın vəsiyyəti və mirası ətrafında yaranan mübahisələr yenidən gündəmə gəlib.
Sənətçinin uzun illər həyat yoldaşı olan Jülide Kural onun böyük sərvətə sahib olması ilə bağlı iddiaları təkzib edib və özü haqqında yayılan məlumatlarla əlaqədar hüquqi addımlar atacağını bildirib.
Sfera.az xəbər verir ki, bu barədə Türkiyə mediası məlumat yayıb.
Jülide Kural açıqlamasında Kadir İnanırın əmlakının birlikdə yaşadıqları ev, üç köhnə avtomobil və bank hesabındakı müəyyən məbləğdə puldan ibarət olduğunu bildirib. O, aktyorun 25 lüks “Rolex” saatının olması barədə iddiaları da təkzib edib.
Kural sənətçinin qurbağa kolleksiyasının da böyük maddi dəyərə malik olmadığını, bu əşyaların onun üçün mənəvi əhəmiyyət daşıdığını vurğulayıb.
Vəsiyyət ailədə fikir ayrılığı yaradıb
Mübahisənin əsas səbəbi Kadir İnanırın 2022-ci ildə notarius qarşısında hazırladığı vəsiyyətnamədir. Həmin sənədə əsasən, aktyor əmlakını, müəllif hüquqlarını və adından istifadə hüquqlarını uzun illər həyat yoldaşı olmuş Jülide Kurala vəsiyyət edib. Sənətçinin bacısı oğlu Levent İnanır vəsiyyətnamənin hazırlandığı dövrdə aktyorun səhhətindəki problemlərin onun qərarvermə qabiliyyətinə təsir göstərmiş ola biləcəyini iddia edib və hüquqi yollara müraciət edəcəyini açıqlayıb.Digər bacısı qızı Gül Bakar isə Kadir İnanırın qərarına hörmətlə yanaşdığını bildirib.
“Evlənmək istəməyən tərəf mən idim”
Jülide Kural aktyorla uzun illər davam edən münasibətlərinə də aydınlıq gətirib. O, rəsmi nikaha daxil olmaq istəməyən tərəfin özü olduğunu açıqlayıb. Kuralın sözlərinə görə, münasibətlərinin əsasını hüquqi status deyil, sevgi, etibar və ortaq həyat qurmaq istəyi təşkil edib.
O, aktyorun xəstəliyindən və ölümündən sonra uzun müddət onların həyatında olmayan şəxslərin məsələyə müdaxilə etməsini qəbul etmədiyini bildirib.
Kural özü haqqında yayılan məlumatları şəxsi hüquqlarına müdaxilə kimi qiymətləndirərək vəkili Bişar Alınak vasitəsilə hüquqi proses başladacağını açıqlayıb.
O, açıqlamasının sonunda Kadir İnanıra duyduğu həsrəti ifadə edərək “Ah Kadir, sən gedəli dünya çox pisdir...” sözlərini yazıb.
Qeyd edək ki, mirasla bağlı mübahisələr vəsiyyətnamənin hüquqi qüvvəsi ətrafında davam edir. Tərəflərin iddiaları ilə bağlı yekun məhkəmə qərarı barədə məlumat isə ayrıca təsdiqlənməlidir.
Fatimə
Sfera.az
