Tərəzidə rəqəmlər dəyişmirsə, səbəbi bu ola bilər
Arıqlamaq üçün düzgün qidalanmaq və hərəkətli olmaq vacibdir. Lakin çəkiyə yalnız qəbul edilən kalorilər təsir etmir. Orqanizmdə aclıq, toxluq, qan şəkəri və maddələr mübadiləsini tənzimləyən hormonlar da çəki idarəsində mühüm rol oynayır.
Sfera.az xəbər verir ki, bəzi hormonal dəyişikliklər iştahanın artmasına, daha tez-tez yemək istəyinə və arıqlamağın çətinləşməsinə səbəb ola bilər.
1. İnsulin
Qan şəkərinin tənzimlənməsində iştirak edir. İnsulin müqaviməti yarandıqda çəkiyə nəzarət çətinləşə bilər.
2. Leptin
Beyinə toxluq siqnalı göndərir. Artıq çəki zamanı leptin yüksək olsa belə orqanizm hormona kifayət qədər cavab verməyə bilər.
3. Qrelin
“Aclıq hormonu” kimi tanınır. Səviyyəsinin artması daha tez acmağa və yemək istəyinin güclənməsinə səbəb ola bilər.
4. Kortizol
Stress hormonu olan kortizol uzunmüddətli stress zamanı iştahaya və xüsusilə yüksək kalorili qidalara olan istəyin artmasına təsir göstərə bilər.
5. Qalxanabənzər vəz hormonları
Bu hormonların azlığı maddələr mübadiləsinin yavaşlamasına, yorğunluğa və çəki artımına səbəb ola bilər.
6. Estrogen
Bədəndə yağların paylanması və metabolik proseslərlə əlaqəlidir. Hormonal dəyişikliklər xüsusilə qarın nahiyəsində yağlanmaya təsir göstərə bilər.
7. Peptid YY
Yeməkdən sonra bağırsaqlardan ifraz olunur və toxluq hissinin yaranmasına kömək edir.
8. GLP-1
İştaha, toxluq və qan şəkərinin tənzimlənməsində rol oynayır. Son illərdə çəkiyə nəzarətdəki təsiri ilə daha çox gündəmə gəlib.
Mütəxəssislər hormonları özbaşına dəyişdirməyə çalışmaq əvəzinə balanslı qidalanma, müntəzəm fiziki aktivlik, kifayət qədər yuxu və stressin idarə olunmasını tövsiyə edirlər. Səbəbi bilinməyən çəki artımı və ya arıqlamaqda davamlı çətinlik varsa həkim müayinəsi vacibdir.
Mənsumə
