Yaşıl çay hər kəsə faydalı deyil – Kimlər içməməlidir?
Yaşıl çay faydalı içki hesab olunsa da, həddindən artıq istehlakı bəzi insanlarda yan təsirlərə səbəb ola bilər.
Sfera.az xəbər verir ki, yaşıl çay sağlamlıq üçün faydalı içkilərdən biri hesab olunsa da, onun həddindən artıq istehlakı bəzi insanlarda müxtəlif yan təsirlərə səbəb ola bilər.
Tərkibində kofein olan yaşıl çayın həddən artıq qəbulu ürəkdöyünmə, baş ağrısı, başgicəllənmə, ürəkbulanma, yuxusuzluq və hətta bəzi hallarda qusma kimi problemlər yarada bilər. Xüsusilə kofeinə həssas insanlar bu içkidən istifadə edərkən diqqətli olmalıdırlar.
Mütəxəssislər hamilə və süd verən qadınların, uşaqların, eləcə də ürək, böyrək, qaraciyər və mədə problemləri olan şəxslərin yaşıl çay qəbul etməzdən əvvəl həkimlə məsləhətləşməsini tövsiyə edirlər.
Bundan əlavə, bəzi dərmanlarla yaşıl çayın tərkibindəki maddələr arasında qarşılıqlı təsir yarana bilər. Antibiotik, qan durulaşdırıcı, ürək və təzyiq dərmanları qəbul edən şəxslər bu içkidən istifadə etməzdən əvvəl həkimə müraciət etməlidirlər.
Yaşıl çayın faydaları arasında antioksidant xüsusiyyətləri, ürək-damar sağlamlığına müsbət təsiri və çəki nəzarətinə müəyyən qədər dəstək olması göstərilir. Lakin bu faydalar onun limitsiz miqdarda qəbul edilə biləcəyi anlamına gəlmir.
Sağlam yetkinlər üçün yaşıl çayın gündə 2-3 stəkandan çox qəbul edilməməsi məsləhət görülür. Xüsusilə axşam saatlarında içilməsi yuxusuzluğa səbəb ola biləcəyindən, miqdara və qəbul vaxtına diqqət etmək vacibdir.
İradə Elsevər
