Misirdə 5 min illik sərdabə aşkarlandı
Misirdə arxeoloqlar təxminən 5 min il yaşı olan iki qədim sərdabə aşkar ediblər. Mütəxəssislər hesab edirlər ki, bu tapıntılar sonradan məşhur Giza piramidalarının tikintisində istifadə edilən mühəndislik texnologiyalarının mənşəyini anlamağa kömək edə bilər.
Sfera.az xarici mediaya istinadən xəbər verir ki, sərdabələr Nil çayının şərq sahilində, Minya vilayətinin Cəbəl əl-Tayr bölgəsində aşkarlanıb.
Tədqiqatçıların sözlərinə görə, sərdabələrin quruluşu mürəkkəb tikinti üsullarının Giza piramidalarının inşasından əsrlər əvvəl mövcud olduğunu göstərir. Alimlərin diqqətini xüsusilə divarların alt hissəsinin daha enli, yuxarıya doğru isə tədricən daralan forması cəlb edib. Bu konstruksiya tikililərin dayanıqlığını artırırdı və sonralar Misirin monumental memarlığının əsas xüsusiyyətlərindən birinə çevrilmişdi.
Qazıntılar zamanı daş emalı izləri və divarlara yerləşdirilmiş iri taxta tirlər də aşkar olunub. Mütəxəssislərin fikrincə, bu tirlər tikinti prosesi zamanı konstruksiyanı möhkəmləndirmək üçün istifadə edilib. Onlardan bəziləri tikilinin demək olar ki, bütün uzunluğu boyunca uzanır.
Arxeoloqlar bildirirlər ki, yeni tapılan sərdabələrin memarlıq xüsusiyyətləri qədim Misirin ilk hökmdarlarının, o cümlədən firon Denin dəfn olunduğu Abidos kral sərdabələrini xatırladır. Bu isə inkişaf etmiş tikinti texnologiyalarının ölkə ərazisində düşünüləndən daha erkən yayıldığını göstərə bilər.
Bundan əlavə, qazıntılar zamanı Misirin birləşdirilməsindən əvvəlki dövrə aid daha qədim qəbiristanlıq da aşkarlanıb. Burada döl vəziyyətində dəfn edilmiş, həsirlərə bükülmüş insan qalıqları, fironlardan əvvəlki dövrə aid saxsı qablar, həmçinin sonrakı dövrlərə məxsus taxta tabutlar tapılıb.
Alimlər hesab edirlər ki, bu kəşf sadə dəfn tikililərinin minilliklər boyu qorunub qalan nəhəng daş abidələrə necə çevrildiyini izləməyə imkan verir və Misir memarlığının inkişafı ilə bağlı mövcud təsəvvürləri dəyişə bilər.
Firuzə Əliyeva
