İdman edənlərin sayı artıb - STATİSTİKA
Avropada insanların idman və fiziki aktivliyə marağı son illərdə artıb. Lakin Avropa ölkələri arasında idmanla məşğul olma tezliyi, eləcə də insanların fiziki aktivlik imkanları baxımından ciddi fərqlər müşahidə olunub.
Sfera.az xəbər verir ki, Avropa Komissiyasının idman və fiziki aktivliklə bağlı keçirdiyi “Eurobarometer” sorğusunun nəticələrinə görə, avropalılar 2022-ci illə müqayisədə daha çox idman edir və fiziki aktivliklə məşğul olurlar.
Sorğuda müxtəlif sosial və demoqrafik qrupları təmsil edən 26508 nəfər iştirak edib. Respondentlərin təxminən yarısı hər gün və ya həftədə bir neçə dəfə idman etdiyini bildirib. Eyni zamanda, idmanla heç vaxt məşğul olmadığını deyənlərin payı 2022-ci ildəki 45 faizdən 39 faizə düşüb.
Gündəlik idmanla məşğul olanların sayına görə Finlandiya və Danimarka öndədir. Finlandiyada respondentlərin 21 faizi, Danimarkada isə 20 faizi hər gün idman etdiyini bildirib. Hər iki ölkədə respondentlərin daha 59 faizi həftədə bir neçə dəfə fiziki aktivliklə məşğul olduğunu qeyd edib.
Ən aşağı göstəricilər isə Portuqaliya, Yunanıstan və Rumıniyada qeydə alınıb. Portuqaliyada respondentlərin 68 faizi, Yunanıstan və Rumıniyada isə 66 faizi heç vaxt idman etmədiyini bildirib.
Sorğuda iştirak edənlərin sözlərinə görə, fiziki aktivliklə məşğul olmağın əsas səbəbləri arasında sağlamlığın qorunması, istirahət və psixoloji rifahın yaxşılaşdırılması yer alıb. Respondentlərin demək olar ki, hamısı fiziki aktivliyin psixi sağlamlığın yaxşılaşmasına töhfə verdiyini düşünür. Əksəriyyət bunun cəmiyyətlər arasında əlaqələrin güclənməsinə və sosial baxımdan həssas qrupların rifahının yaxşılaşmasına da kömək etdiyini bildirib.
İdmanla daha az məşğul olan insanlar üçün isə ən böyük maneə vaxt çatışmazlığıdır.
Respondentlərin 37 faizi bunu əsas səbəb kimi göstərib. 26 faiz motivasiya və marağın azlığını, 15 faiz sağlamlıq problemləri və ya xəsarətləri, 12 faiz isə xərcləri əsas maneə hesab edib.
Təhsil və maddi vəziyyətlə fiziki aktivlik arasında da ciddi əlaqə müşahidə olunub. Təhsilini ən azı 20 yaşına qədər davam etdirən insanların 59 faizi həftədə bir neçə dəfə idman etdiyini bildirib. Təhsilini 15 yaşında və ya daha əvvəl başa vuranlar arasında bu göstərici cəmi 23 faizdir.
Maddi çətinlik yaşayan insanlar arasında da idmanla məşğul olmayanların sayı daha çoxdur. Hesablarını ödəməkdə ən çox çətinlik çəkən insanların 54 faizi heç vaxt idman etmədiyini deyib. Maddi baxımdan nadir hallarda və ya heç vaxt çətinlik yaşamayanlarda isə bu göstərici 26 faizdir.
Yaş qrupları arasında da ciddi fərq var. 15-24 yaşlı insanların təxminən dörddə üçü həftədə ən azı bir neçə dəfə idman edir. 75 və yuxarı yaşda olanlarda isə bu göstərici cəmi 25 faizdir. Yaşlı insanlar üçün əsas maneə sağlamlıq problemləri və xəsarətlər olduğu halda, gənc və orta yaşlı şəxslər daha çox vaxt çatışmazlığından şikayətlənirlər.
Sorğuda insanların digər məqsədlərlə, o cümlədən işə gedib-gəlmək və bağçılıq zamanı nə qədər fiziki aktiv olduqları da araşdırılıb.
İşə və ya digər gündəlik fəaliyyətlərə gedərkən aktiv hərəkət edən insanların payı 2022-ci ildəki 24 faizdən 37 faizə yüksəlib. Ən azı 10 dəqiqə fasiləsiz piyada yeridiyini bildirənlərin payı isə 72 faizə çatıb. Bununla belə, bütün avropalılar yaşadıqları ərazilərin piyada və velosipedlə hərəkət üçün əlverişli olduğunu düşünmür. Bu amil də insanların gündəlik həyatında fiziki aktivliyi artırmaq imkanlarını məhdudlaşdıra bilər.
Bəsti Rəfizadə
Sfera.az
