İranın neft ixracı sıfıra yaxınlaşıb - Blokada öz təsirini göstərir
İranın neft ixracı ABŞ-nin dəniz blokadası nəticəsində demək olar ki, tamamilə dayanmaq nöqtəsinə gəlib.
Sfera.az xəbər verir ki, "FGE" konsaltinq şirkətinin fəxri sədri Fereydun Feşaraki "Bloomberg"ə verdiyi müsahibədə bildirib ki, Respublikaçılar Partiyasının aralıq seçkilərdəki uğursuz çıxışı Tehranın Prezident Donald Trampı siyasi cəhətdən zəifləmiş görməsinə yol açıb. Feşarakinin sözlərinə görə, İran hazırda Ağ Evin qəbul edə bilməyəcəyi şərtlər irəli sürür.
Hürmüz boğazının müvəqqəti olaraq yenidən açılmasını nəzərdə tutan razılaşmaya toxunan ekspert qeyd edib ki, hazırda tərəflər həll yolundan çox uzaqdırlar, hətta iyun ayındakı anlaşma memorandumundan əvvəlki dövrlə müqayisədə daha pis vəziyyətdədirlər. O, Tramp və İsrail Baş naziri Netanyahunun hərəkətə keçmək üçün vaxtlarının az olduğunu, buna görə də İrana qarşı yeni hücumların baş vermə ehtimalının yüksək olduğunu vurğulayıb.
Feşaraki hazırda İraq vasitəsilə dünya bazarına gündəlik yalnız 200-300 min barrel İran neftinin çıxarıldığını diqqətə çatdıraraq deyib:
"Noyabrın sonuna qədər onlar faktiki olaraq ac qalacaqlar, çünki ölkəyə heç bir pul daxil olmayacaq".
Tədarükün demək olar ki, tamamilə dayanması səkkiz aydan çoxdur davam edən müharibədən sonra Tehranın ən mühüm gəlir mənbəyini ciddi təzyiq altında qoyur. Münaqişədən əvvəl sanksiyalara məruz qalan İran xam neftinin əsas alıcısı Çin idi. Xüsusilə də endirimli qiymətə təklif olunan neft ölkənin müstəqil neft emalı zavodları tərəfindən böyük rəğbətlə qarşılanırdı.
"Bloomberg" agentliyinin gəmilərin izlənilməsi sisteminə əsaslanan hesablamalarına görə, sentyabr və oktyabr aylarında tankerlərə heç bir xam neft yüklənməyib. Sentyabr ayı müharibənin fevralda başlamasından bəri neft yüklənməyən ilk ay kimi qeydə alınıb.
Vasif
