Trampın Ağ Evə gətirdiyi Uill Şarf KİMDİR?
ABŞ Prezidenti Donald Tramp daha əvvəl onun hüquqi işlərində vəkil kimi çıxış etmiş Uill Şarfi (Will Scharf) Ağ Evin hüquq müşaviri vəzifəsinə təyin edib.
Sfera.az xəbər verir ki, Tramp bu barədə “Truth Social” platformasında paylaşım edib. Bildirib ki, Şarf sentyabrın 1-dən etibarən prezidentin köməkçisi və Ağ Evin hüquq müşaviri kimi fəaliyyət göstərəcək.
Şarf bu vəzifədə David Uorrinqtonu əvəz edəcək. Tramp Uorrinqtonun Ağ Evin hüquq müşaviri kimi “həqiqətən əla iş” gördüyünü qeyd edib və onun özəl sektora keçəcəyini bildirib.
ABŞ lideri Şarfın hazırkı vəzifəsində, Ağ Evdə katiblik xidmətinin rəhbəri kimi uğurlu fəaliyyət göstərdiyini vurğulayıb. O, həmçinin Şarfın Milli Paytaxt Planlaşdırma Komissiyasına rəhbərlik etdiyini xatırladıb.
Trampın sözlərinə görə, Şarf əvvəllər onun bir sıra məhkəmə işlərində, o cümlədən ABŞ Ali Məhkəməsindəki proseslərdə vəkilliyini həyata keçirib. Bayden administrasiyasının korrupsioner və qanunsuz silahlandırma kampaniyası adlandırdığı proseslər zamanı Şarfın onu müdafiə etdiyini bildirən Tramp yeni hüquq müşavirini yüksək qiymətləndirib.
Şarf hüquq sahəsində geniş təcrübəyə malikdir. O, federal prokuror kimi çalışıb, özəl hüquq praktikasında fəaliyyət göstərib və iki federal apellyasiya məhkəməsinin hakiminin yanında hüquq katibi vəzifəsini icra edib. O, həmçinin Prinston Universiteti və Harvard Hüquq Məktəbində təhsil alıb.
Tramp Şarfı sərt, güclü və ağıllı hüquqşünas kimi xarakterizə edərək onun ABŞ-yə və qanunlara hörmət etdiyini bildirib.
Ağ Evin hüquq müşaviri prezident və administrasiyaya qanunvericilik aktlarının imzalanması, əfv qərarları, mümkün maraq toqquşmaları və digər hüquqi məsələlərlə bağlı məsləhətlər verir.
Firuzə Əliyeva
Sfera.az
