UNESCO nüfuzunu itirir - Təşkilatın üzvlərinin sayı azala bilərmi?
ABŞ Birləşmiş Millətlər Təşkilatının Təhsil, Elm və Mədəniyyət Təşkilatı olan UNESCO-dan çıxmaq barədə qərar verib. Bu barədə Ağ Evin mətbuat katibinin müavini Anna Kelli açıqlama yayıb. O bildirib ki, UNESCO Amerika maraqlarına uyğun gəlməyən təşəbbüsləri və mübahisəli məsələləri dəstəkləyir.
Bəs ABŞ-nin bu addımı digər dövlətlər üçün nümunə ola bilərmi?
Mövzu ilə bağlı Sfera.az-a açıqlama verən siyasi şərhçi Elman Vəliyevin sözlərinə görə, UNESCO BMT-nin mədəniyyətə dair ixtisaslaşmış qurumudur və dini, irqi, cinsi ayrı-seçkilik etmədən dünya xalqları arasında mədəni, elmi və təhsil sahələrində əməkdaşlığı təşviq edir:
“UNESCO-nun məqsədi müxtəlif mədəniyyətlər arasında körpü qurmaqdır. ABŞ-nin bu qərarının arxasında hansı səbəblərin dayandığı aydın deyil. Amma ABŞ-də, xüsusilə də Tramp dövründə irqi ayrı-seçkiliyin artması faktı ortadadır. Ola bilər ki, UNESCO-nun bu sahədəki mövqeyi və təşəbbüsləri ABŞ tərəfindən narahatlıqla qarşılanıb”.
Ekspert əlavə edib ki, digər dövlətlərin UNESCO-dan çıxacağını ehtimal etmir:
“Əksinə, bu qurum bir çox ölkələr üçün faydalı ola biləcək platformadır və onların maraqlarına xidmət edir”.
Elman Vəliyev qeyd edib ki, ABŞ son illər ərzində bir neçə dəfə UNESCO ilə münasibətlərində gərginlik yaşayıb və 2018-ci ildə də təşkilatdan ayrılmaq qərarı vermişdi. Bu dəfəki addım isə həmin siyasətin davamı kimi qiymətləndirilir.
Bəsti Rəfizadə
Sfera.az
