Zelenski qanunu imzaladı, əhali kütləvi aksiyalara başladı - FOTOLAR
Ukrayna Prezidenti Volodimir Zelenskinin korrupsiyaya qarşı mübarizə aparan əsas qurumların səlahiyyətlərini məhdudlaşdıran qanunu imzalaması ölkədə genişmiqyaslı etirazlara səbəb olub. Müharibənin başladığı 2022-ci ildən bəri ilk dəfə olaraq minlərlə vətəndaş küçələrə çıxaraq qərara etiraz edib.
Sfera.az xarici mediaya istinadən xəbər verir ki, yeni qanun Ukrayna Milli Korrupsiyaya Qarşı Mübarizə Bürosunun (NABU) və Xüsusi Korrupsiyaya Qarşı Prokurorluğun (SAPO) müstəqil istintaq aparmaq hüququnu ləğv edir.
Bu səlahiyyətlər yeni qanunla Baş Prokurorluğa verilir. Qanun parlamentdə ikinci oxunuşda qəbul olunaraq sürətlə təsdiqlənib.
Qanundakı dəyişikliklərin ictimaiyyətdən gizlədildiyi, lakin cəmi bir neçə saat ərzində üzə çıxdığı bildirilir. Xəbərin yayılmasından dərhal sonra Kiyevdə, Prezident Administrasiyasının qarşısında 3 minə yaxın insan aksiya keçirib.
Etirazlara əsasən gənclər qatılıb. Hərbi vəziyyətə baxmayaraq, toplaşan insanlar Zelenskidən qanunu veto etməyi tələb ediblər.
“KyivPost” jurnalisti Sergii Kostezh bildirib ki, vətəndaşlar keçmiş prezident Viktor Yanukoviç dövrünə qayıtmaq istəmir: “Ukraynalılar ölkənin yenidən Rusiyaya bənzəməsinə qarşı çıxırlar”.
Müxalifət deputatı Yaroslav Jeleznyak isə Zelenskinin qanunu etirazlara baxmayaraq dərhal imzaladığını bildirib və “Protestlər onların vecinə deyil” sözləri ilə hökuməti tənqid edib.
Bu hadisə 2014-cü ildə Euromaydan etirazlarından sonra Ukraynada hökumətə qarşı baş tutan ən böyük etiraz aksiyası kimi qiymətləndirilir.
Bəsti Rəfizadə
Sfera.az
