Yaxın Şərqdəki qarşıdurmalar Avropaya keçib. Almaniyanın Düsseldorf şəhərində Dürzi icmasının tərəfdarları ilə Suriya rejimini dəstəkləyən qruplar arasında toqquşma baş verib. Daş və butulkaların atıldığı insidentdə 5-i polis olmaqla ümumilikdə 10 nəfər xəsarət alıb.

Sfera.az xarici mediaya istinadən xəbər verir ki, şəhərin Konrad-Adenauer-Platz meydanında başlayan etiraz aksiyaları zamanı tərəflər arasında gərginlik yaranıb.

Sözlü mübahisələr qısa müddətdə fiziki qarşıdurmaya çevrilib. Polis insidentin qarşısını almaq üçün əraziyə çoxsaylı əməkdaş göndərib və genişmiqyaslı təhlükəsizlik əməliyyatı başladılıb.

Düsseldorf polisi hadisə zamanı daş və şüşələrin atıldığını, bir neçə əməkdaşın yaralandığını açıqlayıb. Qarşıdurmada iştirak edən Suriya rejimi tərəfdarları Türkiyə, Fələstin və Suriya bayraqları, Dürzi tərəfdarları isə Dürzi, İsrail və SDQ (Suriya Demokratik Qüvvələri) bayraqları ilə çıxış ediblər.

Polisin verdiyi məlumata görə, hadisə ilə bağlı ictimai asayişi pozmaq, təhlükəli xəsarət yetirmək və əmlaka zərər vurmaq ittihamları ilə təxminən 20 nəfər saxlanılıb.
“Rheinische Post” qəzetinin yazdığına görə, Dürziləri dəstəkləyən nümayişdə təxminən 500 nəfər, Suriya müvəqqəti hökumətini dəstəkləyən aksiyada isə 200 nəfər iştirak edib.

“Rudaw” agentliyi bildirir ki, Dürzi nümayişini əsasən Rojava və Türkiyənin cənub-şərqindən gələn kürd fəallar təşkil edib. Aksiya iştirakçılarının böyük əksəriyyəti Suriyanın Rojava bölgəsindən gəlmiş şəxslər olub. Hazırda şəhərdə təhlükəsizlik tədbirləri artırılıb.

Bəsti Rəfizadə
Sfera.az

Suriya böhranı Almaniyaya sıçradı: Düsseldorfda qarşıdurma - VİDEO