Kreml İkinci Dünya müharibəsinin 80-ci ildönümü münasibətilə Çin paytaxtı Pekində keçiriləcək tədbirdə Rusiya Prezidenti Vladimir Putinlə ABŞ Prezidenti Donald Tramp arasında görüş təşkil etməyə hazırlaşır. Rusiya-Ukrayna müharibəsi səbəbindən gərginləşən münasibətlər fonunda bu görüşün kritik əhəmiyyət daşıdığı bildirilir.

Sfera.az xarici mediaya istinadən xəbər verir ki, Kremlin sözçüsü Dmitri Peskov, prezident Vladimir Putinin Pekinə səfər edəcəyini təsdiqləyərək, Trampı da orada görmək istədiklərini deyib.

“Pekinə səfərə hazırlaşırıq. Amma Trampın ora gələcəyi ilə bağlı hələ heç nə eşitməmişik”, – deyə Peskov bildirib.

Tramp və Putin arasında Çinin dövlət başçısı Si Cinpinin də iştirak edəcəyi üçtərəfli görüş ehtimalı barədə danışan Peskov, Trampın tədbirdə iştirak etməsi halında belə bir görüşün keçirilməsinin gündəmə gələ biləcəyini qeyd edib.

Britaniyanın “Times” qəzeti ötən həftə Çin rəhbərliyinin Tramp və Putin arasında görüş təşkil etməyə çalışdığını yazmışdı. Məlumata görə, Tramp yanvarda Ağ Evə qayıtdıqdan sonra Putinlə ən azı altı dəfə telefonla danışıb. Lakin bu danışıqlara baxmayaraq, Trampın Rusiyaya qarşı sərt mövqeyi dəyişməyib. O, bu ayın əvvəlində verdiyi açıqlamada, “Putindən durmadan mənasız sözlər eşidirik” deyə narazılığını ifadə etmişdi.

Tramp, keçən həftə Rusiya və ondan məhsul alan şirkətlərə yeni sanksiyalar tətbiq edəcəyini də açıqlayıb. Sözügedən sanksiyaların sentyabr ayının əvvəlində qüvvəyə minməsi gözlənilir.

Kreml, Trampla üzbəüz görüşün tərəfdarı olduğunu, lakin bunun nəticəyönümlü olmasını istədiklərini bildirib.

Bəsti Rəfizadə
Sfera.az

Kremldən təklif: Tramp və Putin bu şəhərdə görüşsün